Telebista

Franck Dolosor kazetariak ez du ETBn jarraituko

Kazetari lapurtarrak 22 urtez egin du lan ETBn, nagusiki Ipar Euskal Herriko albisteen berri ematen.

Franck Dolosor ETBrentzat lanean, sareetan argitaratu duen argazkian. FRANCK DOLOSOR
Paulo Ostolaza.
2021eko irailaren 5a
16:07
Entzun

Franck Dolosorrek (Donibane Lohizune, Lapurdi, 1977) berak sare sozialetan iragarri duenez, ez du ETBn jarraituko. Albisteak erreakzio andana eragin du, eta, kazetariaren txioaren erantzunetan ikus daitekeen moduan, askok txalotu dute haren ibilbidea, eta eskerrak eman dizkiote egindako lanagatik. Bihar bertan Urdin Euskal Herria Irratian hasiko da lanean Dolosor, Ipar Euskal Herriko irrati publikoan.

Askorentzat, Ipar Euskal Herriko albisteei aurpegia jarri dien kazetaria da Dolosor; 22 urtez jardun du lan horretan ETBn. Gehienbat albistegietan eta Iparraldearen orena saioan jardun du, eta saio horretan azken aldiz ikusi ahalko da kazetari lapurtarra irailaren 13an. Dena den, larunbatero Radio Euskadiko La galeria saioan parte hartzen jarraituko duela esan du.

Hasieran aipatu bezala, sare sozialetan dozenaka erabiltzailek eman dizkiote eskerrak Dolosorri egindako lanagatik. Hedoi Etxarteren txioak laburbildu du askok albistea irakurtzean sentitu dutena: «Serio? Niretzat zu zara Iparraldeko telebista», erantzun dio.

Hainbatek azpimarratu dute Dolosorrek Iparraldeko albisteak Hegoaldeko publikoarengana gerturatzeko izan duen gaitasuna, eta hutsune hori betetzea zaila izango dela ere aipatu du batek edo bestek.

Kazetari izateaz gain, bere herria den Senpereri (Lapurdi) buruzko bi ikerketa liburu ere argitaratuak ditu Dolosorrek: Senperetik Senpererat, begirada bat XX. mendeari (Elkar, 2009), eta Matxin Irabola, Senpereko bertsularia (Elkarlanean, 2010).

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.