Albistea entzun

Ardogintza

Arabak ardoaren gaia politizatzea egotzi dio Errioxari

Ramiro Gonzalez Arabako Ahaldun nagusiak «ez dagokion auzietan esku hartzea» leporatu dio Errioxako presidente Concha Andreuri, salaketari babesa adierazteagatik. Kontseilu arautzailearekin ere haserre dago, «erkidego bakar baten» erakundea bilakatu delakoan.

Mahats bilketa Villabuenan, artxiboko irudian.
Mahats bilketa Villabuenan, artxiboko irudian. Jaizki Fontaneda / Foku Tamaina handiagoan ikusi

Iker Aranburu -

2021eko irailak 10

Arabako Mahastiak sor-marka proiektuaren auziak gatazka politikora salto egin du. Errioxa jatorri izeneko Kontseilu Arautzaileak gaurko bileran erabaki zuen auzitegietara eramatea Arabako Mahastiak onartzeko espedientea. Erabaki horri babesa emateko, kontseiluaren bileran parte hartu zuen Concha Andreu (PSOE) Errioxako autonomia erkidegoko presidenteak. Agerraldi horrek sumindu egin du Ramiro Gonzalez Arabako ahaldun nagusia, auzia «politizatzea» iruditzen baitzaio, eta hitz gogorrak izan ditu Andreurentzat: «Eskaera egin dutenak Arabako enpresak dira. Ez dagokion auzietan esku hartze onartezin bat da». Kontseilu Arautzailea ere kritikatu du Gonzalezek: «Gaur egun ez da jatorri izenaren lurralde osoaren kontseilu arautzailea, baizik eta erkidego autonomo batena, eta hori oso larria iruditzen zait».

Auziaren politizazioa ez da gauza berria, baina, oro har, norabide batetik etorri da: Errioxatik. Lurralde horretan hasiera-hasieratik ziurtatu dute Arabako Mahastiak proiektu politiko bat zela, abertzaleen saiakera bat Errioxari eta haren ardoari kalte egiteko. Errioxako eragile politiko, ekonomiko eta sozial gehienek eutsi diote ildo horri, indar handiagoarekin edo txikiagorekin.

Eztabaida horretatik kanpo geratu nahi izan dute Araban, eta upeltegi batzuen proiektua dela nabarmendu nahi izan dute. Berez, Eusko Jaurlaritzak eta Arabako Aldundiak ez dute bat egin: ulerkorrago azaldu da Arantxa Tapiaren saila, eta uzkurrago Arabako Aldundia. Gonzalezek berak gogorarazi zuen atzo sor-marka berria sortzearena ez dela bere gobernuaren proiektua, «zilegia» iruditu arren, eta nahiago lukeela Errioxa aterkipean marka propio bat sortzea, «Bordelen arrakastaz funtzionatzen duen moduan». Eskaera horri jaramonik ez egitea aurpegiratu zion jatorri izeneko gehiengoari, eta jarrera horrekin arrazoi ematen diela sor-markatik atera nahi duten upeltegiei.

Eztabaida maila politikoan kokatu ez den arren, egia da Arabako alderdien aldetik egon dela lerrokatze bat: proiektuaren aurka PSE-EE eta PP, alde EH Bildu eta Elkarrekin Ahal Dugu, eta zatituago, berriz, EAJ.

40 upeltegiren eskaera

Arabako Mahastiak eratzeko urratsa ABRA Arabako Errioxako Upeltegien Elkarteko 40ren bat kidek egin dute; ehundik gora kide ditu elkarte horrek, eta gutxi batzuek alde egin dute, proiektua salatzeko. Eskatzaileen argudioa da azken urteetan asko handitu dutela ekoizpena upeltegi handiek, eta euren produktua bereizteko eta negozioa egiteko aukerarik ez dutela. Gainera, Grupo Riojan batutako upeltegi handien tresna izatea egotzi diote Kontseilu Arautzaileari.

ABRAko ordezkariek auzibidearen aurkako botoa eman zuten atzo Kontseilu Arautzailearen bozketan, eta abstenitu egin ziren UAGA Arabako nekazarien sindikatua eta Araex elkartea. Azken horretan neurri erdiko upeltegi esportatzaile batzuk biltzen dira, Arabako Errioxakoak gehienak. Emaitza, ordea, garbia izan da: auzibidearen aldeko 134 boto, hamalau abstentzio eta aurkako boto bakarra.

Kontseiluaren bilerara azalduta, haren jarduna «arrakalarik gabe babesten» duela adierazi zuen Andreuk, «errioxar guztien defentsan».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

 ©BERRIA
Donostiako erdialdeko etxebizitza bat alokagai. ©JON URBE / FOKU
Atzo Gasteizen egin zuten bilketari hasiera emateko ekitaldia. ©RAUL BOGAJO / FOKU

Zoru etiko baten eske

Aitor Biain

Sinadurak biltzen hasi dira baldintzarik gabeko oinarrizko errenta eskatzeko. Ekinaldiaren xedea da proposamena Eusko Legebiltzarrera eramatea han eztabaidatzeko eta lege izaera emateko. Sustatzaileek uste dute inoiz baino arrazoi gehiago dagoela gaur egun tresna hori eskura izateko.

 ©ANDONI CANELLADA / FOKU

«Oinarrizko errenta zerbitzu publiko bat izango litzateke»

A. Biain

Bollainek irizten dio gutxieneko diru sarrera bat bermatzeko errentak ez direla nahikoa izan pobrezia amaitzeko. Dio, ordea, oinarrizko errentari esker herritarrek eskubide gehiago eta askatasun handiagoa izango dutela.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Egin BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna