Albistea entzun

Ikus-entzunezkoak

Plataformetan euskararentzako kuota finkatzeko exijitu diote Madrili

Pedro Sanchezen gobernua prestatzen ari den ikus-entzunezkoen legean zehazten da Europako ekoizpenetatik %50ek gazteleraz izan beharko dutela, «edo erkidego autonomoetako beste hizkuntza ofizial batean».

Pantailak Euskaraz ekimenaaurkeztu zuten ekainaren 9an. Irudian, Iñigo Arandia, Aintzane Gamiz, Alex Aginagalde eta Patxo Larrinoa bultzatzaileak.
Pantailak Euskaraz ekimenaaurkeztu zuten ekainaren 9an. Irudian, Iñigo Arandia, Aintzane Gamiz, Alex Aginagalde eta Patxo Larrinoa bultzatzaileak. Gorka Rubio / FOKU Tamaina handiagoan ikusi

Edu Lartzanguren -

2021eko irailak 21 09:56

Hautsak harrotu ditu Espainiako Gobernua prestatzen ari den ikus-entzunezkoaren legearen egitasmoak. Kataluniako El Periódico egunkariak zabaldu duenez, lege asmoak zehazten du Europako film, telesail eta dokumentalen «gutxienez %50» gorde behar dela «Espainiako Estatuaren hizkuntza ofizialean edo autonomia erkidegoetako hizkuntza ofizialetakoren batean dauden lanetarako». Testuak ez du zehazten zer kuota izango duten gaztelera ez diren hizkuntzek, eta, hortaz, kuota horretatik dena gazteleraz plazaratzea erabaki dezakete Netflix, HBO, Amazon eta bestelako plataformek, nahi izanez gero.

Beheralako erreakzioa sortu du filtrazioak, eta Sanchezen Gobernuari sostengua ematen dieten alderdi independentistek ohartarazi diote ez dutela legea onartuko, horrek ez badu zehazten hizkuntza bakoitzarentzat gorde beharreko kupoa.

Eusko Jaurlaritzak ere hitz egin du gaiaren inguruan, eta legean hizkuntza guztiak berdin tratatzeko eskatu dio Madrili. Bingen Zupiria eledunak adierazi duenez, Jaurlaritzak uztailean emendakinak aurkeztu zituen berdintasuna eskatzeko. Testua aurretik moldatzen ez bada, Espainiako Legebiltzarrean pasatu beharko duen tramitean aukera egongo da zuzentzeko, ohartarazi duenez.

Sanchezen Gobernuari Espainiako Kongresuan sostengua ematen dieten alderdi independentistetako eledunak gaiaren inguruan mintzatu dira, eta PSOEri ohartarazi diote hizkuntzak babestea «lerro gorri» bat dela. EH Bilduko Mertxe Aizpuruak adierazi du testua onartezina dela dagoen moduan. Testuan aukera ematen diete plataformei gazteleraren eta beste hizkuntza ofizialen artean aukeratzeko, «eta argi dago zein aukeratuko duten», esan du. «Diskriminazio argia da». Euskal ikus-entzunezkoen alorrak eginiko eskaerei entzungor egiten die testuak, Aizpuruaren arabera. Kongresura heltzen denean lege asmoari zuzenketa bat jarriko diola ohartarazi du.

Ildo beretik jo dute Kataluniako ERCk eta PdeCatek. Azken alderdi horretako eledun Ferran Belek mezu argia bidali dio Sanchezi: PSOEk legea bere horretan onartzen badu PP, Ciudadanos eta Voxen laguntzarekin, «legegintzaldiaren etorkizuna berriz osorik planteatu beharko du».

EAJk, ordea, nahiago izan du jarrerarik ez hartu Espainiako Gobernuak onartuko duen testua ezagutu arte. Halere, Madrili eskatu diote «gazteleraz ez diren kultur produktuak laguntzeko eta babesteko erregimen nahiko eta egoki bat».

Iñigo Errejonen Mas Pais taldeak ere esan dio PSOEri ez diola sostengurik emango egitasmoari, «hizkuntza koofizialen arazoa konpontzen ez badu».

Espainiako Gobernuak, berriz, bidea zabalik utzi du bestelako neurriak hartzeko hizkuntzak babesteko. «Gobernuak konpromiso osoa du hizkuntz koofizialak babesteko, gure herrialdearen aberastasunaren parte direlako», adierazi du Nadia Calviño lehen presidenteordeak. Datozen egunetan testua «txukuntzen» amaituko dutela gaineratu du.

Euskal Herrian hainbat egitasmo sortu dira azken hilabeteotan euskarak ikus-entzunezkoetan duen egoera aldatzeko. Izan ere, streaming plataformak zabaldu ahala, euskaraz ikus daitekeen edukien proportzioa izugarri txikitu da. Pantailak Euskaraz mugimendua sortu dute zenbait eragilek, ikus-entzunezkoetan euskarak duen presentzia txikiarekin arduratuta. Horretan ari dira Netflix Euskaraz herritar taldea, Disney Plus Euskaraz herritar taldea, Tinko euskara elkartea eta Bieuse bikoizle euskaldunen elkartea, esaterako. Berriki sortutako Zinema Euskaraz herritar taldeak ere bat egin du haiekin.

Nazioarteko plataformei gaztelerarentzat kuotak ezartzea eta beste hizkuntzentzat berdin ez egitea eskema «etnozida» bat dela esan zion BERRIAri Enric Marin adituak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ibaetako Campusean duela hilabete batzuk egindako manifestazioa. ©GORKA RUBIO/FOKU

EHUk espediente informatibo bat zabaldu dio eraso sexista batengatik salatu duten irakasleari

Berria

Arkitektura Fakultateko irakasle batek ikasleei eraso sexista bat egin ziela salatu dute UIB Unibertsitateko Indar Batasunak eta Arrakala emakume taldeak. Gertakariari buruzko «informaziorik» ez ematea leporatu diote EHUri.

Ziudadelaren barnaldea, asteazkenean. ©BERRIA

Hipika txapelketa bukatu eta hilabete eta erdira, Iruñeko Ziudadela hondarrak hondatua dago oraindik

Uxue Rey Gorraiz

Iruñeko Udalak antolaturiko hipika txapelketak irailaren 12an izan zuen azken eguna. Ordea, txapelketarako erabilitako Ziudadelako zuloguneak hareaz beteak dira oraindik. Navarra Sumak salbu, udaleko talde politikoek adierazpen bat onartu dute eremua berehala egokitu dadila eskatzeko.

Arabako, Bizkaiko eta Gipuzkoako erakundeetako arduradunak izan dira BECen, gaurko aurkezpenean ©Irekia

Zaintza ereduaren «paradigma aldaketa» jaso du Jaurlaritzaren estrategia soziosanitario berriak

Edurne Begiristain

2021-2024 aldirako estrategia soziosanitarioa aurkeztu dute Arabako, Bizkaiko eta Gipuzkoako instituzio nagusiek. Besteak beste, «adinekoak beren etxean edo etxe baten antzekoak diren zentroetan» bizitzea sustatuko dute.

Aste honetan Haurrak Bai-k deituta Ataungo Joxemiel Barandiaran herri ikastetxean egin duten eserialdia. / ©Goierriko Hitza

Jolasgaraian 12 urtetik beherakoak maskara janztera derrigortzen dituen aginduari eutsiko dio Jaurlaritzak

Jon Ordoñez Garmendia

Gotzone Sagarduik argudiatu du haurrak babesteko neurri bat dela, eta esan du gaur egungo egoera ez dela ona.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.