Lemoako (Bizkaia) Gantzabal mendiaren gainean dagoen gurutzea eraitsi dute Ernai gazte antolakundeko kideek, Hispanitatearen Egunaren bezperan. 1937an eraiki zuten, frankisten garaipena gogoratzeko.
1936ko Gerra hasi zenetik 85 urte igaro direnean, oraindik ere «faxismoari gorazarre egitea zilegi dela» salatu du gazte antolakundeak, ohar batean: «Monumentu hauek, Frankismoaren elementu sinboliko izatetik harago, Frankismoak 78ko erregimenean biziraun duenaren erakusle dira». Izan ere, Ernaik uste du «78ko erregimena Frankismoaren oinordeko politikoa» dela, eta haren ezaugarria dela «demokrazia eta askatasuna» ukatzea, bai Euskal Herriari, baita bertako herritarrei ere. Horren adibidetzat ditu, besteak beste, monarkia, elite ekonomikoen agintea, kolonialismoa, komunikabide handien erabateko kontrola eta herrien erabakitze eskubidearen onarpen eza.
🇪🇸🔥 Espainiar faxismoarekin hautsi! Lemoako gurutze frankistarekin egin bezala, 78ko Erregimena ere eraitsiko dugu.
— Ernai (@ernaigazte) October 11, 2021
Urriaren 12an ez dugu ezer ospatuko, batu eskualdekako mobilizazioetara.#GazteokIndependentziapic.twitter.com/DWAZaqHuGm
Belaunaldi berriei «faxismoaren eta 78ko erregimenaren aurka» borrokatzera eta «bestelako Euskal Herri bat» eraikitzera dei egin die Ernaik: «Antifaxista, askea, feminista, burujabea, euskalduna eta langile eta herritarron bizitzak erdigunean jarriko dituen errotiko eraldaketa sozialean oinarritzen dena».
Helburu horrekin, bihar egingo dituen mobilizazioetara batzeko eskatu die gazteei. Eskualde mailako elkarretaratzeak eta manifestazioak antolatu ditu biharko.
