Albistea entzun

Erreakzioak

«Ekarpena» eta «aurrerapausoa» nabarmendu dituzte ETAren lau biktimak

BERRIAk galdekatutako ETAren biktimek azaldu dute «aspaldi» espero zuten berri ona dela, baina eszeptizismoa ere agertu dute.

Maixabel Lasa hizketan, atzo, Madrilen.
Maixabel Lasa hizketan, atzo, Madrilen. Emilio Naranjo / EFE Tamaina handiagoan ikusi

Paulo Ostolaza - Jon O. Urain -

2021eko urriak 18 09:52

Aurrez sekula erabili gabeko terminoetan hitz egin dute gaur Sortuk eta EH Bilduk. Hainbat dira azken urteetan ezker independentistari «autokritika» hori egiteko eskatu dioten alderdiak, eragileak eta biktimak, eta, behin helduta, erreakzio andana eragin du adierazpenak. Mezuak harrera ona izan du BERRIAk biktimen artean bildutako iritzien artean; oro har, nabarmendu dute albiste pozgarria dela eta horixe zela eskatzen zutena.

Maixabel Lasa ETAk hildako Juan Mari Jauregiren alargun eta Jaurlaritzaren Biktimen Bulegoko zuzendari ohiari, esaterako, ETAren biktima batek eman dio adierazpenaren berri: «Esan diot: ‘Albiste ona, ezta?’. Gero alabak bidali dit testua, eta irakurtzeko aukera izan dut». Azaldu du «aspaldian espero» zuten pausoa dela: «Biktimen aldetik eskatzen genuena zen». Halere, PSOEri begiratu dio Lasak: «Orain nire galdera da ea zer egiten duen Alderdi Sozialistak; bere hausnarketa egin beharko luke, etxean dituen trapu zaharrak astintzeko. Inplikatuta zeuden gauzak argitzeko: GAL eta abar».

Lasaren iritziz, PSOEk «aukera ezin hobea» du «hausnarketa» egiteko: «Ausartak izan behar dute hori argitzeko. Orain ezin dute esan besteek egin ez dutenik. Ezinbestekoa da; Juan Mari oso ausarta izan zen egin zituen gauzekin, eta ausardia hori eskatzen diot PSOEri; ez nuke bestela ulertuko». Lasak berak eguerdian hitz egin du Euskadi Irratia-n, eta azaldu du garai egokia izan daitekeela berriz ere ETAko kide ohien eta haien biktimen arteko topaketei berrekiteko. Ofizialki, ez dira egin 2012tik.

Jendaurrean eskerrak eman dizkieten lehenengoetako bat Maria Jauregi izan da, ETAk hildako Juan Mari Jauregiren alaba.

Roberto Manrique Bartzelonako Hipercor dendan ETAk egindako atentatuan zaurituak aukera izan du beste biktima batzuekin albisteari buruz aritzeko, eta horien artean orokortua da albistearekiko ikuspegi positiboa: «Itxi beharreko beste atal bat itxi da. Duela hamar urte garrantzitsuena itxi zen: ETAk borroka terrorista amaitzea. Horraino, primeran; biktima gehienek eta herrialde honetako pertsona gehienek espero genuena zen». Manriqueren hitzetan, orain berretsi da biktima askok eskatu dutena: «Hainbeste urteren ondoren biktimen ondoan egon ez denak akats hori onartzea. Egin da; zoragarri. Oso urrats garrantzitsua da biktima askorentzat». Azaldu du ezin duela ETAren biktima guztien izenean hitz egin, baina bai «tratu jarraitua» daukan horien izenean: «Oso pozik gaude, helburu bat lortu delako: beste alde batera begiratzen zutenen aldetik biktimok izan dugun abandonua aitortzea».

Manriqueren arabera, biktima horietako askoren «helburu komuna» zen «inork ez sufritzea» eurek jasan duten oinazea. Atzokoa, berriz, norabide berean emandako beste pauso baten gisara dauka: «Beste urrats bat da bihar hamar urte beteko dituena egonkortzeko: bizikidetza Euskadin eta handik kanpo».

«Aurrerapausoa»

Norabide berean mintzo da Alberto Muñagorri ere. ETAk motxila batean jarritako lehergailu batek eztanda egin zuen, eta Muñagorri zauritu. 10 urte zituen. Harentzat ere «berri ona» da: «Nik nahiago ditut ekintzak hitzak baino; oraindik pausoak falta dira, baina elkarbizitzari egiten zaion ekarpen oro positiboa da. Lehenago iritsi behar zuen, baina inoiz ez da berandu. Albiste onak dira; duela hamar urtekoa eta oraingoa».

Naiara Zamarreño ETAk hildako Manuel Zamarreñoren alabak ere «aurrerapauso bat» antzeman du: «Horrelako pausoak behar dira, eta horrek eramango gaitu beste mota bateko elkarrizketa batzuetara. Eta hori behar da; desblokeatzea, hitz egitea». Halere, «eszeptikoa» da, eta nahiago zukeen Aieteko Konferentziaren eta ETAk jardun armatua eten zueneko urteurrenaren testuingurutik aparte egin izan balute adierazpena: «Eskertzekoa da hausnarketa, baldin eta benetakoa bada». «Oso berandu» iritsi da, haren iritziz.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Anjel Lekuona —eserita—, 1940 inguruan, hiru kiderekin. ©ANTON GANDARIAS

Naziek erretako osabaren errautsak

Javi West Larrañaga

Anjel Lekuonaren bideari segitu dio iloba batek; 36ko gerrako jazarpenetik ihesi, Espainiako errepublikaren alde aritu zen Katalunian, eta nazien aurka Frantzian. Haren errautsak Pragan azaldu dira, hilerri batean.
Durangoko Jesuiten eliza, bonbardatu zuten egunean. ©GEREDIAGA ELKARTEA

Memoriak galdu zituen paperak

Jone Arruabarrena

Durangoko bonbardaketaren ondoren, 84 hildako sartu zituzten bi hobi komunetan. Handik egun batzuetara, lurperatuen zerrenda desagertu zen. Hildakoen senideen bila dabiltza orain.

Asier Guridiren askatasuna eskatzek 2013an egindako elkarretaratze at ©Marisol Ramirez / Foku

Asier Guridik baieztatu du errefuxiatu estatusa lortu duela

Berria

Venezuelan dagoen euskal iheslariak gose greba abiatu zuela jakinarazi zuen abenduaren 3an, eta Caracasko Espainiako kontsulatuaren aitzinean plantatu zen.

Zazpi alkateak, gaur goizeko agerraldian. ©EH BILDU

EH Bilduko alkateek txosten bat eskatuko dute Ingurumen Administrazioko Legeak udalen eskumenetan izango duen eraginaz

Jone Arruabarrena

EAJ eta PSEri leporatu diete «demokraziaren kontrako erasoa» dela legeari egin nahi dioten aldaketa, eta udalen eskumenak urratzea dakarrela. Hamabost eguneko epean txostena aurkezteko galdegin diote EUDELi.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.