Emakume bat espetxeratu dute gizonezko bikotekidea hiltzea egotzita

Joan den ostegunean hil zuen, labankadaz, lagun baten etxean zeudela. Emakumea akusaziopean ezarri du Baionako prokuradoreak, eta presondegian sartu dute behin-behinean. Emakumeen aurkako bortizkeriagatik zigortua izan zen gizona joan den abuztuan.

Baionako epaitegiak, artxiboko irudi batean. GUILLAUME FAUVEAU,
Berria
2021eko urriaren 19a
13:27
Entzun

34 urteko emakume bat atxilotu zuten joan den ostegunean, Angelun (Lapurdi), bere 43 urteko gizonezko bikotekidea labanaz zauritu eta hiltzeagatik, Sud Ouest egunkariak jakinarazi duenez. Baionako prokuradoreak akusaziopean ezarri du «nahitara eragindako heriotza» leporatuta, eta behin-behinean preso sartu dute. Gizonezkoa zigortu egin zuten abuztuan emakumeen aurkako bortizkeriagatik, eta hura ikusteko debekua zuen.

Bien ezagun baten etxean aterpetzen zen bikotea, baina ostegunean ez zegoen bertan. Gizonezkoa labankadaz zauritu ondotik, auzokoak abisatu zituen emakumeak, baina larrialdi zerbitzuak iritsi zirenerako beranduegi zen, eta ez zuten suspertzea lortu. Hasieran bere buruaz beste egin zuela erran bazuen ere, galdeketetan labankada berak eman ziola aitortu zuen. Larunbatean, preso sartzea erabaki zuen Baionako prokuradoreak.

Lehenago ere izana zuen arazorik bikoteak, joan den abuztuan Baionako epaitegian epaitu eta zigortu baitzuten gizonezkoa, emakumeen kontrako indarkeriagatik. Hura ikusteko debekua eman zioten, baina ordutik behin baino gehiagotan elkartu dira berriz, eta Sud Ouest-en arabera, elkarrekin bizi ziren biak.

Ipar Euskal Herriko Itaiak gogor salatu du «emakumeak jasan behar izan duen egoera eta puntu horretaraino iritsi behar izana», eta azpimarratu du Angelun jazotakoa, hain zuzen, «instituzio burgesek emakume langileak babesteko duten gaitasun faltaren» erakusle dela.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.