2020ak ekarritako geldialdiaren ondoren, berriro abiada hartu du kanpo merkataritzak. Hego Euskal Herriko enpresek 22.656 milioi euroren ondasunak esportatu zituzten urtarriletik abuztura, iaz tarte horretan baino 4.016 gehiago (+%21,5).
Inportazioak nabarmen gutxiago dira (18.573 milioi euro), baina askoz gehiago handitu dira azken urtean: 3.600 milioi, hain zuzen ere (+%27,7).
Aurtengo hazkundeak ez du erabat konpentsatu iaz galdutakoa. Orain arte, esportazioak 2019koak baino %3 txikiagoak dira, eta inportazioak, berriz, %2,5 txikiagoak.
Ohikoa den bezala, ekipamendu ondasunak dira gehien esportatzen diren gaiak, %34, hain zuzen ere. Batezbestekotik behera hazi dira, ordea, %11 baizik ez. Haien ondoren, autoak esportatzen dira gehien (+%22,5), eta %27,6 handitu dira azken urtean.
Azken hilabeteetan hazkunde ekonomikoaren moteltze bat antzematen ari den arren, abuztua ez da txarra izan merkataritzarentzat: %24,3 handitu dira esportazioak, eta %43,4 inportazioak.