Albistea entzun

Rull: «Espainiak salbuespen politika amaitu behar du»

Txalo artean hartu dituzte manifestazioan espetxean izan diren Kataluniako buruzagi independentistak. Alderdi eta sindikatuetako ordezkari guztiek eskatu dute salbuespeneko espetxe politikaren amaiera.

Kataluniako preso ohi independentistak, Mertxe Aizpurua EH Bilduren Espainiako Kongresuko ordezkariarekin, gaur, Donostian.
Kataluniako preso ohi independentistak, Mertxe Aizpurua EH Bilduren Espainiako Kongresuko ordezkariarekin, gaur, Donostian. JON URBE / FOKU Tamaina handiagoan ikusi

Iosu Alberdi -

2021eko urriak 23 09:41

EAJk, EH Bilduk, Ahal Dugu-k eta ELA, LAB, UGT, Steilas, ESK, EHNE, Etxalde, Hiru, CNT eta CGT sindikatuek babestu dute gaurko martxa. Manifestazioa hasi aurretik argazkia atera dute denek elkarrekin. Baina han egon diren ordezkari guztien artean, Katalunian duela gutxi espetxetik atera ziren buruzagi independentistak izan dira manifestazioaren protagonista nagusiak.

Mobilizaziora joandakoek txalo artean jaso dute Kataluniatik iritsitako ordezkaritza. Donostian dira Kataluniako presidenteorde ohi Oriol Junqueras, Dolors Bassa, Josep Rull eta Raul Romeva kontseilari ohiak, eta Carme Forcadell Kataluniako Parlamentuko presidente ohia. Denak ere prozesu subiranistaren aurkako ebazpenen ondorioz preso egonak. Horien artean, Junquerasek (ERC) eta Rullek (JxC) hartu dute hitza. Kataluniako presidenteorde ohiak azaldu du «aste berezia» dela hau, besteak beste, ezker abertzaleak astelehenean eginiko adierazpenaren ostean: «Adierazpen ausarta, zintzoa, eta bakera eta giza eskubideen babesera bidean eginikoa». Hala, nabarmendu du Euskal Herriak «elkarrizketaren, negoziazioaren eta akordioaren bidea» hartu duela, «gatazka politikoari konponbidea emateko asmoz».

Rullek, berriz, azaldu du bi direla Donostian egoteko arrazoiak. Batetik, euren espetxealdian «euskal gizartearen partetik jasotako babesa eskertzea». Bestetik, «euskal gizartearen gehiengo handi baten» eskaerak babestea: «Ez du zentzurik hamar urteren ostean, Espainiako estatuak hala jarraitzea». Rullen hitzetan, gatazka armatu bati amaiera ematean, ezinbestekoa da alde guztiek «eskuzabaltasuna» erakustea, eta horren parte behar luke estatuak «espetxe eta zigor zuzenbidearen normalizazioa» bultzatzea. «Espainiako Gobernuak salbuespen politikarekin amaitu behar du», nabarmendu du.

Azken hilabeteetan presoen gaian eginiko urratsak «positibotzat» jo ditu EAJko legebiltzarkide Irune Berasaluzek, eta bide horri jarraitzeko eskatu dio Madrili: «Espainiako Gobernuari eskatzen diogu salbuespen legedia buka dezala, ezabatu dezala». Haren hitzetan, «inoiz justifikaziorik izan ez duen legediak» preso askoren eskubideak urratu ditu, eta Aieteko Konferentziaren 10. urteurrena garai «aproposa» da hura bertan behera uzteko. Aldaketak presoen «gizarteratzea» izan behar du helburu, Berasaluzek azaldu duenez. Uste du bide horretan egin daitezkeen urratsek presoek «gogoeta kritiko bat» egitea ere erraztu dezaketela.

Aieteko Konferentziaren 10. urteurrena izan du hizpide EH Bilduko bozeramaile Maddalen Iriartek ere. Adierazpen hark hurrengo urteetako bide orria zehaztu zuela azaldu du, baina gogoratuz oraindik ere bete ez diren puntuak daudela: «Bai gatazkaren konponbidera bidean, bai euskal presoen eskubideak gauzatzerakoan». Horren eredutzat jarri du gaurko mobilizazioa: «Beste behin ere kalera atera gara euskal presoen eskubidea aldarrikatzera». Berasaluzek egin bezala, Iriartek ere Espainiako Gobernuari zuzendu dio bere mezua, «bere legea» bete dezala exijitzeko: «Urrats oso garrantzitsua emango litzateke herri honetan milaka eta milaka herritarrek eskatzen duten elkarbizitzaren alde».

Ahal Dugu-ren izenean, Aitzole Aranetak eta Maite Gartziak hartu dute hitza. Lehenak «ezinbestekotzat» jo du euskal presoak gerturatzea eta haien eskubideak errespetatzea. Hala, «funtsezko aldarrikapen» bati erantzunez batu da mobilizaziora. Gartziak ere «justua ez den espetxe legedia» aldatzearen aldeko mezua bota du: «Justizia sozial bat egoteko, giza eskubideak ez urratzearen alde egin behar dugu».

ELAko ordezkari Amaia Muñoak, berriz, bi salaketa egin ditu. Batetik, «onartezintzat» jo du Espainiako Gobernuak presoen gaiarekiko duen jarrera, eta exijitu dio, «aitzakiarik gabe», espetxeratuen eskubideak errespetatu ditzala, justizia trantsizionalaren mesedetan. Bestetik, presoen «erabilera politikoa» egitea egotzi dio Madrili: «Ezin da onartu gobernuak egiten duen xantaia. Presoak erabiltzen ditu bere politikak aurrera ateratzeko». Bide beretik, euskal sindikatuek gaiaren inguruan azaldutako batasuna azpimarratu du LABeko idazkari nagusiaren ondoko Igor Arroyok. Haren ustez, urratsak egin dira egungo egoerari amaiera emateko, baina gehiago behar dira: «Euskal presoak Euskal Herrira ekarri behar dira. Guztiak eta orain». Hala, gehitu Aieteko Konferentziaren 10. urteurrena dela urrats berriak egiteko garaia. «Urrats berri hori da Euskal Herrian, euskal jendartean eta euskal sindikatuon artean ere planteatzea argi eta garbi euskal presorik gabeko agertoki bat».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

EH Bilduko alkateek txosten bat eskatuko dute Ingurumen Administrazioko Legeak udalen eskumenetan izango duen eraginaz

Jone Arruabarrena

EAJ eta PSEri leporatu diete «demokraziaren kontrako erasoa» dela legeari egin nahi dioten aldaketa, eta udalen eskumenak urratzea dakarrela. Hamabost eguneko epean txostena aurkezteko galdegin diote EUDELi.

Bernat Etxepare lizeoko ikasleen protesta, Oier Oaren alde ©Guillaume Fauveau

Oier Oari ez diote lurralde debekua kenduko, eta familiatik banatua segitu beharko du

Ekhi Erremundegi Beloki

Gaur eman du erabakia Parisko Zigor Auzitegiak. Otsailean epaituko dute, Baionan, lurralde debekua urratzea leporatuta.

Llotja de Marreko alderdien ordezkariak, iaz, Espainiako Kongresuan. ©Javier Lizón / EFE

Alderdi subiranistek Espainiako Konstituzioa «agortuta» dagoela aldarrikatu dute

Paulo Ostolaza

Konstituzioaren Egunaren bezperan, ohar bateratu bat plazaratu dute Llotja de Marreko akordioaren sinatzaileek. «Herrien autodeterminazio eskubidean oinarritutako eredu bat» eskatu dute.

 ©GORKA RUBIO / FOKU

«Gure ustez, beharrezkoa da EAJ gobernutik kanporatzea»

Gotzon Hermosilla

Ezker Anitza-IUk X. Batzarra egin du, eta EAEn «ezkerreko alternatiba sendo bat» osatu behar dela nabarmendu dute berriro, «Nafarroan egin denaren antzera».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.