Imajinatu: supermerkatura joan eta benetako bananak egon ohi diren lekuan plastikozkoak aurkitzen dituzula. Edo urazak egon ohi diren lekuan haien argazkiak daudela. Zer esanik ez, garagardo batzuk erostera joan eta haien itxurako kartoi batzuk badaude, bi dimentsiokoak.
Bada, hori ari da gertatzen Erresuma Batuko supermerkatu kate handietako bitan, Tescon eta Sainsbury'sen: hornidura arazoak dituzte, eta, horri «aurre egiteko», ez zaie bururatu konponbide egokiagorik. Tescok joan den ostiralean atera zuen bere azken produktua: gari zainzuri kartoizkoak.
Sainsbury’s aren’t even trying to make it look genuine pic.twitter.com/DdRJM4hIrU
— Sharon Dale (she/her) (@pixlz) October 22, 2021
Zein da, ordea, hornidura faltaren arrazoia? Nagusiki, langile falta. Atzerritar askok herrialdetik alde egin behar izan zuten orain urte bat edo bi, brexit-aren ondorioz bertan lan egiteko baimena galduta eta ezin berreskuratuta. Lehenik, garraiolarien falta sumatu zuten; gero, harakinena, eta, orain, nekazariena. Ez dago eskulanerako jenderik. Portuetan ere arazoak dituzte.
Adituek diotenez, supermerkatu handiak, orain, handiegiak dira. Espazio hutsek irudi txarra ematen dute, eta kartoizko elikagaiak jartzea ez da teknika berria, ezta bakarra ere: hutsuneak publizitatearekin bete izan dituzte, edo korridore osoak garagardo paketeak banan-banan jarriz bete.
Pictures of Oranges to fill the empty shelves in Tesco today @Tescopic.twitter.com/12LsNxFIxZ
— jeremy selwyn (@jeremyselwyn1) October 23, 2021
Tescok, berriz, ez du onartu argazkiak hornidura faltaren ondorio direnik, eta adierazi du katearen salmentek gora egin dutela. Gehitu du argazkiak aspalditik erabiltzen dituztela.
Aukera gutxiago
Ohiko supermerkatuek geroz eta eskaintza murritzagoa dute Erresuma Batuan. Berez, ohikoa da halako supermerkatuek 40.000 produktu izatea; baina, orain, geroz eta aukera sorta txikiagoa dute. Adibidez, lehen izan zitzaketen baino pasta mota eta marka gutxiago dituzte, eta gauza bera gertatzen da freskagarriekin ere. Balio erantsi gutxi duten produktuak dira, eta, ondorioz, horiexek ari dira kentzen lehenengo.
