Bi egun dira Kanada mendebaldean euriteak jasaten ari direla, eta, horrek eragindako uholdeen ondorioz, gutxienez lagun bat hil eta bi desagertu dira Columbia Britainiarra probintzian, Kanadako Poliziak jakinarazi duenez.
Eraginik handiena Vancouver hirian eta horren inguruan nabaritu dute: herrialdeko porturik garrantzitsuena du, eta horretarako sarbidea blokeatu egin da, baita probintziako zenbait trenbide eta autobide ere. Enbridge Inc. enpresak ere azaldu du Kanada mendebaldean dauden bi gasbideetako baten zati bat itxi behar izan duela, «badaezpada».
Herenegun, gainera, erreskate taldeek ia 300 herritar salbatu behar izan zituzten, eta probintziako hegoaldean dagoen Merritt hiriko 7.100 lagun ebakuatu behar izan zituzten; Abbotsford eta Chilliwack herrietan ere ebakuazio lanak egin behar izan dituzte.
Crews have restored power to more than 219,000 customers throughout the province in the last 48 hours. Here are the latest updates: https://t.co/CdECGEBmCm#BCStormpic.twitter.com/goFeWFN2Mt
— BC Hydro (@bchydro) November 16, 2021
Gainera, 20.000 etxe elektrizitaterik gabe daude, eta sakelakoen seinalea eten egin da batzuetan. Kanadako Ingurumen Ministerioaren arabera, ez da euririk espero gaurko, baina litekeena da bihar berriz egitea, baita elurra ere.
Egoera horren ondorioz, Columbia Britainiarraren hegoaldean dagoen Washingtongo estatuko (AEB) gobernadore Jay Insleek larrialdi egoera ezarri du asteon.
Iragan uztailean, Kanada hego-mendebaldean ia 500 hildako eragin zituen bero boladak: 45 gradutik gorako tenperaturak izan zituzten.
