Albistea entzun

Musika

Musikenek hainbat kontzerturekin ospatuko du hogeigarren urteurrena

Musikene Orkestra Sinfonikoak Euskal Herriko lau konpositoreren lanak joko ditu otsaileko emanaldi nagusian. Eskolako bandek eta taldeek datorren asteburuan abiatuko dute urteurreneko ikasturteko programazio berezia.

Miren Iñarga Musikeneko zuzendaria eta Adolfo Morais Eusko Jaurlaritzako Unibertsitate eta Ikerketa sailburuordea, gaur, urteurreneko egitarauaren aurkezpenean.
Miren Iñarga Musikeneko zuzendaria eta Adolfo Morais Eusko Jaurlaritzako Unibertsitate eta Ikerketa sailburuordea, gaur, urteurreneko egitarauaren aurkezpenean. Gorka Rubio / Foku Tamaina handiagoan ikusi

Andoni Imaz -

2021eko azaroak 18

Hogei urte bete berri dira Musikene Euskal Herriko goi mailako musika ikastegia martxan jarri zutenetik, Donostiako Miramar jauregian. Orain dela bost urte aldatu ziren EHUko unibertsitate campuseko eraikin berri batera, eta han aurkeztu dute gaur goizean 2021-2022ko ikasturterako prestatu duten programazio berezia. Hainbat kontzertu egingo dituzte, eta euskal egileen lanak zabaltzeko bestelako jarduera batzuk ere bai. Miren Iñarga Musikeneko zuzendari nagusi eta akademikoak aurkeztu du egitaraua, Adolfo Morais Eusko Jaurlaritzako Unibertsitate eta Ikerketa sailburuordeak lagunduta.

Musikene Orkestra Sinfonikoak kontzertu berezi batzuk emango ditu urteurrenaren barruan, datozen egunetan hasita: etzi eta astelehenean, Santa Zezilia egunean, taldeak bi kontzertu emango ditu Jose Antonio Saiz Alfarok zuzendutako Donostiako Orfeoiarekin batera, Bilboko Arriaga antzokian eta Donostiako Viktoria Eugenian, hurrenez hurren.

Ekitaldi nagusia datorren urteko otsailean egingo dute. Hego Korean bizi den Unai Urretxo zuzendariak diseinatu du egitaraua, eta Euskal Herriko konpositoreak omenduko dituzte haien musika joaz: Jesus Guridiren Preludio de Mirentxu, Pablo Sorozabalen Siete lieder, Francisco Eskuderoren Concierto vasco para piano eta Francisco Madinaren Tetraludium. Emanaldia otsailaren 12an izango da, Musikeneko auditoriumean, doan.

Azkenik, eskolako orkestra Erik Nielsen Bilboko Orkestra Sinfonikoaren zuzendariarekin ariko da maiatzaren 14an, Rakhmaninoven eta Brahmsen pieza bana jotzen. Emanaldi horiez gain, bandak eta sinfoniettak ere egingo dituzte kontzertu batzuk.

Musikeneko big bandak eta Leioako (Bizkaia) San Juan Bautista abesbatzak emango dutena nabarmendu du Iñargak: Duke Ellingtonen Sacred Concert obra joko dute bi kontzertutan; Perico Sambeatek zuzenduko du taldea, eta Basilio Astulezek abesbatza. Lehena Tolosako Leidor aretoan (Gipuzkoa) izango da, maiatzaren 13an, eta bigarrena, Gasteizko Jesus Guridi kontserbatorioan, handik bi egunera.

Iñargaren hitzetan, eskolaren egiteko nagusietako bat euskal musikaren ondarea zabaltzea da, eta hori bera egin nahi dute urteurreneko ekitaldien bidez ere. Helburu horrekin argitaratu dute Carmelo Bernaola musikariari eskainitako disko bat, haren La celestina eta Galatea, Rocinante y Preciosa lanak jasotzen dituena, Bernaolaren ikasle Zuriñe F. Gerenabarrenak haren omenez konposatutako obra batekin batera. Gainera, gaur egungo euskal konpositoreei buruzko beste bi kaier aterako dituzte Eresbilekin lankidetzan sortutako bildumaren barruan: Felix Ibarrondorena eta Gabriel Erkorekarena

Doktoretza, bidean

Morais sailburuordeak nabarmendu du Musikene hazi eta hedatu egin dela urte hauetan guztietan, eta zabaltzen jarraitzen duela oraindik ere. Datuetan adierazi du: 1.200dik gora ikasle atera dira musika ikastegitik denera, eta heziketa sarean eta orkestretan sartu dira ondoren. Egun, eskolak 400 ikasletik gora eta 168 irakasle ditu. Lau gradu eta bost master ikasteko aukera dago, eta, eskaintza osatzeko asmoz, doktoretza programak ere sortuko dituzte laster.

Eusko Jaurlaritzak sustatu zuen Musikeneren sorrera, eta haren sare publikoan dago. Moraisek esan du «apustu sendoa» egin dutela haren alde, eta bide horretan segiko dutela. Hezkuntza Sailak urtean ia hamar milioi euro inbertitzen ditu eskolan. Epe luzerako «ikuspegi egokia» duela uste du, «osatu» egiten baitu ikastetxeen, musika eskolen eta kontserbatorioen sarea.

Iñargak eta biek nabarmendu dute Musikene «erreferentzia» bilakatu dela hezkuntzan eta ikerkuntzan, eta «bikaintasuna eta errekonozimendu sozial handia» lortu dituela, egindako lana gizarteari zabaltzea delako haren helburu nagusietako bat.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©OSKAR MATXIN EDESA / FOKU

«Filmatzea nagoen lekuan egoteko modu dialektiko bat da»

Andoni Imaz

Filmak sortzen dituen artista da, zinemagilea baino gehiago. Eginez egiten du lan, eta konbentzioak desegiten ditu bidean. Bere lana mundu osora zabaldu du; Kaliforniatik urteetan, Euskal Herritik orain.
Raid Awwad, 1987ko argazki batean. ©MAJAZZ PROJECT

Maitasuna eta borroka

Mikel Lizarralde

Palestinan lehen intifada piztu zenean Riad Awwadek grabatutako diskoa desagertuta egon da urte hauetan guztietan. Orain, 'The Intifada 1987' izenburuarekin argitaratu dute.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.