Espainiako Osasun Ministerioak eta autonomia erkidegoek bilera bat egingo dute gaur arratsaldean, Madrilen, Osasun Publikorako Batzordean, eta hizpide izango dituzten gaien artean honako hau egongo da: gaueko 23:00etatik aurrera ostalaritzaren barrualdeak ixtea azken hamalau egunetako intzidentzia metatua 100.000 biztanleko ehun kasutik gorakoa bada eta ospitaleetako presioa handitzen bada. Birusaren transmisioa apaltzeko asmoz egingo die proposamen hori Espainiako Osasun Ministerioak erkidegoei. Hainbat komunikabidek publiko egin berri dute Osasun Ministerioak ondu duen proposamena, eta, haren arabera, Carolina Dariasek gidatzen duen ministerioak COVID semaforoa egiteko orain arte erabili diren langak aldatuko dira. Semaforo berri horren arabera, «arrisku ertaineko eremua» izango da hamalau eguneko intzidentzia metatua 100 eta 300 artekoa denean —une honetan arrisku ertaineko eremutzat jotzen da 50 kasutik beherako intzidentzia baldin badago—. Intzidentziaren aldagaia ez ezik, ospitaleetako okupazioa ere aintzat hartuko da eremu batean arrisku ertaina dagoela erabakitzeko. Kasu horretan, COVID-19ak ospitaleetan hartutako oheen kopurua %5etik gora izan beharko da.
Ostalaritzaren barrualdeak ixteaz landa, Osasun Publikoko Batzordeak gaur aztergai izango duen txostenak bestelako neurri murriztaileak ere proposatzen ditu intzidentzia metatua ehundik gora duten eremuetan: hala nola gaueko aisialdia goizaldeko 01:00etan ixtea, eta dantza egiterakoan maskara derrigorrez jantzita eramatea. Halaber, proposatzen du mahai bakoitzean gehienez hamar pertsona egotea eta barrualdeetako edukiera % 50ekoa izatea.
«Arrisku handiko eremuetan» neurri are zorrotzagoak ezartzea jaso du txostenak: hala, hamalau eguneko intzidentzia metatua hirurehundik gorakoa denean eta ospitaleetako presioa handitzen denean, ostalaritzako barrualdeak edukieraren % 25rekin irekitzea, mahai bakoitzean gehienez sei pertsona biltzea, eta 23:00etan ixtea proposatu du.
Hirugarren dosia
Gaur arratsaldeko bileran, gainera, 60 urtetik gorakoei eta osasun langileei eta osasun soziosanitarioei koronabirusaren aurkako hirugarren txertoa jartzea ere eztabaidatuko dute. Iragan astean aukera horren alde agertu zen Espainiako Txertoen Batzordea, eta Pedro Sanchez Espainiako Gobernuko presidentea. Gaurko bileran erabaki hori onestea espero da.
