Albistea entzun

Lehiakortasuna

Orkestrak dio atzerriko inbertsioak erakartzeko zailtasunak daudela

Lehiakortasunerako Euskal Institutuaren arabera, enpresen produktibitatea eta berrikuntza handitu behar dira, eta, horretarako, ezinbestekoa da kanpoko kapitala eta enpresen arteko lankidetza.

Ivan Marten Orkestra Institutuko presidentea, taldeko beste kide batzuekin, astearte honetan, Bilbon.
Ivan Marten Orkestra Institutuko presidentea, taldeko beste kide batzuekin, astearte honetan, Bilbon. Deustuko Unibertsitatea Tamaina handiagoan ikusi

Jokin Sagarzazu -

2021eko azaroak 23 09:32

Orkestra Lehiakortasunerako Euskal Institutuak ondorioztatu duenez, pandemiak «eragin negatibo handia» izan du enpresen errentagarritasunean, eta azpimarratu du horri buelta emateko ezinbestekoa izango dela lehiakortasuna eta berrikuntza sustatzea, enpresen «produktibitatea handitzeko» eta datozen urteetako «trantsizio handietara» egokitu daitezen. Horretarako, inbertsioak erakarri behar direla dio, baina ohartarazi du dirua atzerritik lortzeko «zailtasunak» daudela. «Euskadi ez da oraindik aski ezaguna kanpoan, eta ez dago nazioarteko erabakiguneetako inbertitzaile handi askoren radarrean», azpimarratu du Ivan Marten presidenteak.

Orkestraren Lehiakortasun Txosteneko ondorio nagusietako bat da hori. Azterketan ez dute zerga sistemari buruzko eztabaidan sakondu; hala ere, kazetarien galderei erantzunez, Martenek adierazi du enpresentzako laguntzak inbertsioak erakartzeko tresna bat direla, baina ez bakarra. «Kontua ez da soilik pizgarri fiskalen bidez erakartzea; helburua da enpresa berritzaileen ekosistema bat sendotzea inbertsio horiek herrialdean gera daitezen, eta horiek balio izatea lehiakortasuna hobetzeko eta, horrekin batera, gizartearen ongizatean laguntzeko».

Enpresa lehiakorragoak lortzeko bidean, horien tamaina handitzea ere ez da beti konponbiderik onena, Martenen arabera. Adibide egoki gisa jarri ditu klusterrak edo enpresak elkarrekin kolaboratzeko sor daitezkeen lankidetza formulak. «Tamaina bezain garrantzitsua da borondatea izatea I+Gn inbertitzeko, nazioartekotzeko eta atzerriko berrikuntza zentroetatik gertu egoteko».

Lan gatazkak ere aipatu ditu Martenek. Lehiakortasuna oztopa dezaketen elementuen artean aipatzen dituzte maiz Euskal Herriko enpresaburuek, baina Orkestrako zuzendariak adierazi du horrek ez duela beste batzuek baino pisu handiagoa inbertsioak erakartzeko orduan, eragina baduen arren.

Ahulguneak

Txostenaren egileek ondorioztatu dutenez, azken hamarkadetan egindako lana dela eta, euskal enpresak «posizio onean» daude COVID-19ak eragindako krisiari eta etorkizuneko «hiru trantsizio handiei» aurre egiteko: ingurumenekoari, energetikoari eta demografikoari. Hala ere, ahulgune batzuk detektatu dituzte.
Kezka agertu dute, adibidez, produktibitate mailarekin. Batasuneko 27 herrialdeen batezbestekoaren gainetik daude Araba, Bizkai eta Gipuzkoako enpresak —42,6 euro lan egindako ordu bakoitzeko-, baina erreferentziazko beste industria eskualdeekin alderatuta, azpitik jarraitzen dute oraindik —Alemanian, oro har, 50,7 eurokoa da—.

Hori gainditzeko, Orkestrako ikertzaileek ezinbestekotzat jotzen dute berrikuntzan inbertitzea. Hala ere, ikerketa eta garapena (I+G) «tokia irabazten» ari den arren, erakundeen eta enpresen gastua Europako batezbestekoaren azpitik dagoela azpimarratu dute, eta orokorrean alor horretan egindako inbertsioek proportzioan behera egin dutela 2008ko krisiaz geroztik.

Euskal ekonomian industriak duen pisua kontuan hartuta, Orkestrak funtsezkotzat jotzen du, halaber, energia garbietarako trantsizioa «modu ordenatuan» egitea. Airearen kalitateari dagokionez, egoerak hobera egin badu ere, ohartarazi du enpresek oraindik ere «asko» dutela hobetzeko gasen isurietan eta birziklatze tasetan, eta Europako batezbestekoaren azpitik daudela nabarmendu du.

Enplegua ere azpimarratu dute ikertzaileek. Araba, Bizkai eta Gipuzkoako langabezia tasa %10aren bueltan dagoen arren, Europako batezbestekoaren (%7,1) gainetik dagoela gogoratu dute, eta kezka berezia agertu dute gazteekin eta emakumeekin. Aurrenekoei buruz, azpimarratu dute haientzako kalitatezko enplegua sortzea «erronka kritikoa» dela, eta andreen kasuan, ohartarazi dute genero arrakala zabaltzen ari den sentsazioa gero eta handiago bihurtzen ari dela urtetik urtera.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Jose Luis Escriva ministroa, Espainiako Kongresuan, gaur, ©RODRIGO JIMENEZ / EFE

EAJk pentsio erreforma babestu du, eta EH Bilduk abstentziora jo du

Xabier Martin

Alderdi jeltzaleak baiezkoa eman dio belaunaldi arteko ekitate tresna jaso duen erreformari, «bidezkoagoa delako». Koalizio abertzaleak «abstentzio kritiko» batera jo du, «bidea egiteko».

Ignacio Sanchez Galan, artxiboko irudian. ©Luis Tejido / EFE

Ignacio Sanchez Galanek urtarrilaren 18an deklaratuko du 'Villarejo auzian'

Irune Lasa

Epaileak izendatu zuen ikertu gisa Iberdrolako presidentea, eroskeriagatik, pertsonen intimitatearen kontrako delituengatik eta merkataritza agiriak faltsutzeagatik. 

Bukatu gabeko furgonetak Mercedesen Gasteizko lantegiko aparkalekuetan. ©David Aguilar / Efe

Hazkundearen moteltzea baieztatu du Eustatek

Iker Aranburu

Urteko bigarren hiruhilekotik hirugarrenera %1 handitu da, urrian aurreratutakoa baino bi hamarren gehiago.

Inoiz baino langile gehiago daude Hego Euskal Herrian

Inoiz baino langile gehiago daude Hego Euskal Herrian

Iker Aranburu - Jokin Sagarzazu

Pandemian galdutako enplegua berreskuratu da: 36.000 lanpostu sortu dira iazko abuztutik. Langabezia tasa krisiaren aurreko mailan dago

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.