ESK sindikatuak jakinarazi duenez, Osakidetzan 2016-2017an egindako lan eskaintza publikoaren iruzurraren auzia ikertzen duen epaitegian etzi ekingo diete berriz auziko inputatuen eta ikertuen deklarazioei. Zehazki, sei lagun daude deklaratzera deituta egun horretarako: kardiologiako eta traumatologiako epaimahaietako lau kide eta bi lekuko.
Sindikatuaren arabera, irailetik inor ez dute deitu deklaratzera. Irailaren hasieran, epaileak beste bederatzi lagun inputatu zituen; hau da, orotara, hogei herritar daude inputatuta. LAB sindikatuen eskaera, ordea, ez zuen onartu: Jon Darpon Eusko Jaurlaritzako Osasun sailburu ohia eta Maria Jesus Mujika Osakidetzako zuzendari nagusi ohia ere auzipetzeko eskatu zuen «asmo bidegabeetarako elkartzearen» delituagatik, baina aukera hori baztertu egin zuen epaileak.
