Kote Cabezudoren aurkako ahozko epaiketa zabaltzea erabaki du Gipuzkoako Auzitegiak

Gipuzkoako Auzitegiak erabaki du Kote Cabezudo argazkilari donostiarraren aurka ahozko epaiketa hastea, haren aurkako auzibide nagusiarekin lotuta. 47 delituren egilea izatea egozten diote, 21 emakumeren salaketak oinarri hartuta. Sexu askatasunaren eta intimitatearen aurkako delituak, iruzurra, eta osotasun moralaren aurkako delituak leporatzen dizkiote, besteak beste. Dagoeneko bost zigor jarri dizkiote argazkilariari.

Efe berri agentziak eskuratu duen autoaren arabera, Gipuzkoako Auzitegiko Lehen sekzioko epaitegiak sumarioaren jarduketetatik ondorioztatu du ikertutako egitateek «delitu izaera» dutela, eta «oinarri nahikoa» dagoela horien aurka egiteko.

Hori dela eta, onartu du ahozko epaiketa abiatzea, fiskaltzak eta akusazio partikularrak (biktimek) eskatu bezala. Auzitegiak baztertu egin ditu, gainera, Cabezudoren defentsak egindako eskaerak: ahozko epaiketaren hasiera atzeratzea eta biktimetako bati egindako ustezko delituak prozeduratik kentzea. Horiek horrela, auzia ahozko epaiketaren atarian legoke: datorren urtean izango litzateke.

Akusatua behin-behineko espetxealdian dago Martuteneko (Gipuzkoa) kartzelan, 2018ko maiatzaren 4tik. 2020ko apirilean, auzitegiek behin-behineko espetxealdia lau urtera luzatzea erabaki zuten, legez ezarritako gehiengora, eta 2022ko udaberrian bukatuko litzateke, hortaz.

Kasuaren instrukzioa 2013an hasi zen, eta 2019ko uztailean itxi zen. Epaileak 47 delitu leporatu zizkion Cabezudori. Orain arte, argazkilaria bost aldiz kondenatu dute guztira. Aurtengo apirilean zortzi hilabeteko espetxe zigorra ezarri zioten, agintarien aurkako desobedientzia leporatuta. Zehazki, epaile batek eskatu zion adingabe bat agertzen zen zenbait argazki eta bideo saretik kentzeko, baina Cabezudok ez zuen bete agindutakoa.

Era berean, zigor arloko epaitegi baten beste epai baten zain dago, ustez Facebookeko profilean edukitzeagatik modelo bat barruko arroparekin agertzen zen irudi bat, epailearen agindua bete gabe. Gainera, 2022ko martxoan beste epaiketa bat izango du, antzeko gertakariengatik, urrian bigarren aldiz atzeratu ondoren.

Cabezudok modaren arloko argazkiak egiten jardun zuen hainbat hamarkadatan; besteak beste, First Models agentziarentzat lan egiten zuen, eta sona zuen. Gerora, harekin lan egindako hainbat modelok salatu egin zuten.