Albistea entzun

Pilota

Oinatz Bengoetxeak pilota profesionala utziko du

Baikok iragarri duenez, Iruñean jokatuko du bere azken neurketa urtarrilaren 29an. Ordura arte agurreko lau partida jokatuko ditu. Hemeretzi urte egin ditu profesionaletan.

Oinatz Bengoetxea Leitzan (Nafarroa), pasa den urrian.
Oinatz Bengoetxea Leitzan (Nafarroa), pasa den urrian. Idoia Zabaleta / Foku Tamaina handiagoan ikusi

Paulo Ostolaza -

2021eko abenduak 7

Oinatz Bengoetxeari iritsi zaio agur esateko unea. Hala jakinarazi du pilotariak berak Baikoren bidez. Leitzako (Nafarroa) pilotariak hemeretzi urte egin ditu profesionaletan (2002ko urrian egin zuen debuta), eta hori «pribilegio bat» dela adierazi du gaur, agurtzeko argitaratu duen bideoan: «Oso harro nago egindako ibilbideaz», gehitu du.

Ez da gutxiagorako. Juan Martinez de Irujo edo Aimar Olaizola bezalako pilotarien belaunaldi berekoa den arren, garaipen garrantzitsuak lortu ditu Bengoetxeak: bi aldiz izan da buruz buruko txapelduna (2008an eta 2017an), 2016an irabazi zuen lau eta erdiko txapelketa, eta 2015ean binakakoa. Txapelketa nagusietan galdutako finalak ere baditu: lau eta erdikoa 2012an, eta binakakoa 2005ean eta 2017an. Denera mila norgehiagoka baino gehiago jokatu ditu.

Hortaz gain, pilotazaleen artean maitatua da Bengoetxea VI.a, eta horren jakitun da: «Urte hauetan guztietan pilotazaleen artean oso maitatua sentitu naiz. Eskertuta nago. Pilotazalerik gabe ez genuke pilota bizirik edukiko; ezinbestekoa da pilotarentzat. Partida guztietan jokoa erakargarria egiten saiatzen naiz, pilotazaleek gozatu dezaten», esan zion BERRIAri pasa den urrian. Izan ere kantxan erakutsi duen joko erasokorra eta alaia da leitzarraren ezaugarri nagusienetako bat.

Kantxatik kanpo, berriz, iaz Baikoko pilotariek egin zuten grebaren bultzatzaile eta aurpegi nagusienetako bat izan zen. Tarteka, BERRIAn ere idatzi izan du zutabe bat edo beste.

Bengoetxeak beste urtebetez jarraitzeko nahia zuela esan zion BERRIAri duela bi hilabete, baina aitortu zuen bazekiela zaila izango zela: «Azken finean, 37 urte ditut, eta lehietan nabaritzen dut fisikoki ez dudala lehengoko gaitasun bera. Ahalmen hori galtzen noa, baita erresistentzia ere; berrindartzea gehiago kostatzen zait», adierazi zuen. Urte bukaeran amaitzen zaio Baikorekin duen kontratua, eta ez dute argitu ez berritzea noren erabakia izan den: enpresarena, pilotariarena edo biena.

Agurrak

Bengoetxeak ez du pilota egun batetik bestera utziko, ordea. Zaletuek hura jokatzen ikusteko aukera izango dute urtarrilaren 29ra arte; egun hartan jokatuko du azken partida, Iruñeko Labrit pilotalekuan. Baikok iragarri ditu agurraren aurretik Bengoetxeak eurekin jokatuko dituen beste neurketak ere: abenduaren 26an Bilbon, urtarrilaren 2an Gasteizen, urtarrilaren 16an Donostian eta urtarrilaren 24an Tolosan (Gipuzkoa). Dena den, urrira arte edo bere kabuz jokatzen jarraitzeko asmoa duela jakinarazi du pilotariak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ondarroako arraunlariak arraunak gora, eta Iñigo Larrinaga patroia banderarekin, atzo, herrian, garaipena zaleekin ospatzen. ©ARITZ LOIOLA / FOKU

Ametsa baino hobea

Aitor Manterola Garate

Ondarroak etxean irabazi du Eusko Label ligako estropada, lehen txandatik. Marea eta haize aldaketa, eta itsaslaster handiak erabakigarriak izan dira
Orioko eskifaia poz betean atzo, Ondarroako estropada irabazi berritan. ©ARITZ LOIOLA / FOKU

Oriok gaur bertan irabaz dezake Euskotren liga

A. Manterola Garate

Nahikoa izango du Arraun Lagunaken aurretik sailkatzea Castro Urdialesen, atzo Ondarroan bederatzigarren estropada irabazi eta gero
 ©ARITZ LOIOLA / FOKU

«Denboraldi hau niretzat azkena balitz bezala gozatuko dut»

Pettan Uralde

Hamalaugarren denboraldia du De Marcosek Athleticen, eta egunez egun gozatzeko ideiarekin ekin dio sasoi berriari. Guardiako jokalariak Europan kokatu du taldearen helburua, eta lortuko dutelakoan dago.
<b>Mikel Larrañaga, iaz, Urrezko Kopa irabazi berritan.</b> ©IÑIGO URIZ / FOKU

Sei aizkolari ariko dira bihar Donostian, Urrezko Kopa xede

Berria

Aurrez kanporaketa gainditutako kirolariek udako garaikur nagusia izango dute jokoan, 19:30ean

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...