Osasun krisiak baldintzatuta eginen dute, aurten ere, euskal presoen etxeratzearen aldeko manifestazioa Baionan. Denbora eskasten hasia zaigu. Jon, Jakes eta Unai gurekin! lelopean, euskal presoen gaiari buruz Frantziako Gobernuarekin duten blokeoa salatuko dute, eta desobedientzia fase bati ekinen diote. Ondoko hilabeteetan ekintza «indartsuak, ausartak, koletiboak eta parte hartzaileak» eginen dituztela iragarria dute, eta larunbatean eman nahi diote hasiera dinamika berri horri. Eragile batek baino gehiagok eman dio babesa aurtengo mobilizazioari, horien artean dira ELB, FSU, eta LAB sindikatuak, Bizi, EH Bai eta Europa Ekologia - Berdeak alderdiak eta Giza Eskubideen Defentsarako Ipar Euskal Herriko Batzordea.
Osasun krisiak baldintzaturik eginen dute aurten ere euskal presoak etxeratzeare aldeko mobilizazioa Baionan. Prentsaurrekoa egin dute goizean Bakegileek azken xehetasunak emaiteko @berria@BakeBidea@Artisans_Paixpic.twitter.com/tLFcwMPDGZ
— Ekhi Erremundegi (@EkhiErremundegi) January 6, 2022
32. urtea beteko dute aurten presondegian Unai eta Jon Parot anaiek eta Jakes Esnalek. Azken biak Frantziako presondegietan daude preso, eta baldintzapeko askatasuna lortzeko aukera dute aspalditik; baina, behin baino gehiagotan ukatu diete. Azken urteetan, terrorismoaren kontrako Frantziako fiskaltzak oztopatu du, behin eta berriz, haien askatzea, Euskal Herriko gatazkaren konponbidean egin izan diren urratsak ukatuta. «Frantziar botere politikoak eta botere judizialak ez duten inongo jarrera aldaketarik erakutsi. Ez zaio inongo konponbiderik atzeman preso eta iheslariek aurre egin behar dieten arazoei. Ez dugu inongo borondaterik ikusten presoen egoerari aterabiderik atzemateko», salatu zuen, abenduan, Anaiz Funosas Bake Bideako presidenteak. Frantziako Justizia ministerioarekin abiatutako elkarrizketa kanalak irekia segitzen badu ere, egoera aitzinarazteko «borondate falta» salatu dute maiz Bakegileek.
Horregatik, larunbateko mobilizazioa abiapuntu berri bat izatea nahiko lukete. Harrabotsa egiteko tresnekin etortzera deitu dituzte herritarrak, «Parisen entzun gaitzaten». Hiru zutabetan abiatuko da manifestazioa, Baionako hiru leku ezberdinetatik: Euskaldunen plazatik, Lauga gelatik eta Reduit plazatik, eta Ipar Euskal Herriko eskualdeen arabera, herritarrak batera edo bestera deitu dituzte. Eragileetako ordezkariak eta hautetsiak Reduit plazan elkartuko dira. Baionako karriketan zehar ibili ondotik, San Andres plazan eginen dute ekitaldia. Bertan iragarriko dute ondoko hilabeteetan garatu gogo duten desobedientzia dinamika, eta parte hartu nahi duten herritarrei izena emateko aukera eskainiko diete.
Gaur egin duten agerraldian, laguntzaile gisa izena ematera ere deitu dituzte herritarrak. Osasun egoeraren ondorioz, parte hartzea bertan behera utzi du batek baino gehiagok, eta azken orduko deialdia egitea erabaki dute. Manifestazioan berean babes neurriak errespetatzeko galdetu dute.
