OME Osasunerako Mundu Erakundeak onartu du benetako «tsunamia» ekarri duela omikron aldaerak COVID-19ak eragindako izurrira, baina, hala ere, gaitzak eragindako heriotza kopuruan apaltze bat ikusi dutela.
Hain justu ere, abenduaren 27tik urtarrilaren 2rako astean, lehengo astean, kasuak %70 ugaritu zirela esan du, inoiz ez zela aurretik horrelako hazkunderik ikusi, baina heriotzak, oro har, %10 apaldu zirela mundu osoan. Lehengo astean zehazki 9,5 miloi kasu egiaztatu ziren, eta gaitzak eragindako heriotzak 41.000 izan ziren.
Zifra absolutuak aintzakotzat hartuta, Europa izan zen kontinente kolpatuena lehengo astean: 5,3 milioi diagnostiko egin zituzten, eta 22.000 gaixo hil zituen COVID-19ak.
Omikron aldaerak era argian aldatu du izurriaren izaera, eta osasun agintariak egoera berriari neurria hartu nahian dabiltza. Omikron OMEk aldaera arriskutsuen artean zerrendatuta duen birusaren aldaeretako bat da.
