Albistea entzun

Migrazioak

Elkartasuna, legeen gainetik

 
Migratzaleekiko elkartasun ekitaldi bat.
Migratzaleekiko elkartasun ekitaldi bat. Guillaume Fauveau Tamaina handiagoan ikusi

Joanes Etxebarria - Iparraldeko Hitza -

2022ko urtarrilak 15

Joan den astean prokuradorearen ordezkari baten aitzinera aurkeztu zen Añamari Koskarat Teyseyre, migratzaile batzuk autoz laguntzeagatik lege urraketaz ohartarazi behar zuelakoan. Frantziako Poliziak azaroaren 20an gelditu zion autoa, lau maliar garraiatzen zituelarik; berehala, Hendaiako komisariara eraman zuten, eta, galdeketaren ondotik, libre utzi eta urtarrilaren 7an aurkezteko deialdia eman zioten. Maliarrak, berriz, mugara itzuli zituzten. Prokuradoreak erabakiko du orain afera sailkatu edo auzibidea ireki nahi duenetz.

Etorkinekiko elkartasuna delitu ote? Joan den astean prokuradorearen ordezkariaren parean, Koskarat Teyseyrek ez zien galderei ihardetsi. “Erran dudan gauza bakarra da ez dakidala zer ari nintzen hor, egin dudanarekin ez baitut legea urratu”, dio. Bost urteko presondegiarekin eta 30.000 euroko isunarekin zigortzen den delitua egotzi diote, legez kanpoko kanpotarrak laguntzeagatik.

Francisco Sanchez Baionako abokatuak zehaztu du bere bezeroak arrazoi duela maila juridikoan ere: “Praktikan ezarri du haurridetasunaren printzipioa, Frantziako Konstituzioan idatzia dena. Ez da hobendun laguntza eskatu badiote, eta hari esker dituzte pertsona horiek tratu txarrak saihestu. Printzipio konstituzionala da; beraz, legea lehertzen du”, erran du Sanchezek. Abokatuak hitzez hitz aipatu du Frantziako araubideak salbuespen gisa kontsideratzen duen egoeraren kasua: “Edozein laguntza ekartzea ez da zigortuko, helburua humanitarioa baldin bada”.

Agerikoa da berriki mediatizatu den beste kasu batekiko diferentzia: baigorriar gazte bat egoera bertsuan atxilotua izan zen, baina diru kantitate handia atzeman zuen Poliziak haren etxea miatzean. Halakorik ez da kasu honetan, Sanchezek erran duenez: “Aferaren kudeaketa tarrapatan egin da. Printzipio konstituzional batekiko ageriko huts egitea ere gertatu da, botere publiko guztiei inposatzen zaielako haurridetasun printzipioa, erga omnes” (betebeharra, latinez).

Defentsa abokatua aski harritua da, berez, prokuradorearen ordezkariaregana joateko ukan deialdiarekin. Koskarat Teyseyrek ez zuen galdetu zitzaion deus izenpetu saio horretan; orain prokuradoreak deliberatu behar du segida eman ala ez. Sanchez bi kasuetarako prest agertu da, sentsibilizazio lan bat egiteko: “Konstituzioak egituratzen ditu norbanakoen eta estatuaren arteko harremanak. Gaizki ezagutua da, bai herritarren partetik, bai autoritateen partetik ere, praktika hauek ikusten direlarik”.

Herriko Etxe batzuk lagun

Irun (Gipuzkoa) eta Hendaia etorkin anitzen pasabide bilakatu da azken urteetan, eta, horien laguntzeko, boluntario anitzek ahal dutena egiten dute. Garraioa, aterpea, janaria beren baitarik eskainiz batzuek; beste batzuek, elkarteetan antolaturik. Bidasoa Etorkinekin elkarteak Hendaiako Herriko Etxearekin eta CCAS erakundearekin (Ekintza Sozialaren Herriko Zentroa) hitzarmena adostu zuen adin txikikoak laguntzeko. Biriatuko Herriko Etxearekin biltzekoak dira, eta, Urruñakoarekin abokatuak aipatu sentsibilizazio lan berdintsua prestatzen ari dira. “Lagunduko gaitu herrian erakusten zeintzuk diren legeak babesturik egin daitezkeen gauzak”, dio Aintzane Lasarte elkarteko kideak.

Baina elkartasunak trabak ditu parean. “Poliziak kontrolak egiten ditu nonahi”, Koskarat Teyseyreren erranetan. Lasartek, Hendaia inguruan, usu ikusten ditu, eta, haren arabera, “polizia batzuek edukazioz hitz egiten dute, eta ez da arazorik, baina beste batzuk erotzen dira”. Elkarteak “kalean” atzematen ditu muga zeharkatu eta laguntza behar duten pertsonak; laguntza berezia behar dutenak artatu, eta Baionako Pausa zentrora eramaten dituzte.

Jean Rene Etxegarai Euskal Elkargoko lehendakaria eta Iñigo Urkullu Eusko Jaurlaritzakoa elkarrekin agerturik ere, eta beste politikariek segurtasun neurriak eskaturik ere, adierazpenek ez dute Irun eta Baiona arteko bidea segur bilakatu, oraingoz, etorkinentzat. Drama desberdinen ondotik, aste hasieran berriro migratzaile bat zauritu zen Frantziako Poliziari ihes egin nahian.

Bidasoa Etorkineko kideak bildu datuen arabera, urtarrilaren 7an 60 bat etorkinek pasatu zuten muga. Beste egunetan, hamar edo hogei izan daitezke eguneko. Laguntzailen artean, berriz, “politikariak pentsarazi eta sentsibilizatzea” da helburu nagusia.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Urte judizialaren irekiera ekitaldia, atzo, Bilbon. ©MIGUEL TOÑA / EFE

Botere judizialaren ospea galtzeko arriskuaz ohartarazi du Urkulluk

Gotzon Hermosilla

EAEko urte judizialari hasiera emateko ekitaldia egin dute Bilbon. Urkulluk kezka azaldu du Espainiako Botere Judizialaren Kontseilu Nagusiaren blokeoaz
Euskaraldiaren aurkezpena, atzo arratsaldean, Baionan. ©GUILLAUME FAUVEAU

Euskal Elkargoak Euskaraldirako ariguneak identifikatuko ditu

Ekhi Erremundegi Beloki

Euskaraldia kari, Euskal Herri osoan sortuko diren batzordeak eta dinamikak iraunarazten entseatu nahi dute aurtengo aldian
Sansoheta auziko epaituak, epaiketaren lehen egunean. ©JAIZKI FONTANEDA / FOKU

Sansohetako auziko sei akusaturentzat 34 urterainoko zigorrak eskatu ditu fiskalak

Irati Urdalleta Lete

Guztira, hamar gizonezko eseri dira akusatuen aulkian, baina beste laurek aurreakordioa erdietsi dute, eta zigor arinagoak jarriko dizkiete
Klima larrialdia salatzeko protesta bat, iaz, Bilbon. ©ARITZ LOIOLA / FOKU

Krisi ekologikoari buruz podcast bat eta buletin bat abiatu ditu BERRIAk

Mikel P. Ansa

Kinka. Klima eta natura krisian podcasta gaurtik aurrera entzun liteke, eta hamabostero atal berri bat kaleratuko dute. Albiste buletin bat ere zabaltzen hasiko dira, urriaren 20tik aurrera.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...