Albistea entzun

Hezkuntza Legea

Hezkuntza itunerako oinarrietan «euskarazko eredu orokortu eta bakarra» falta dela sumatu du Ikastolen Elkarteak

Begi onez hartu du doakotasunaren kontzeptua eta segregazioaren gainean egiten den proposamena, eta, hurrengo egunetan sakonago xehatuko badu ere, esan du Hezkuntza Akordioa eta Legea aberasteko proposamenak egingo dituela.

Kontseiluak eragileekin egindako agerraldia, euskarazko eredu orokortu eta bakarra eskatzeko.
Kontseiluak eragileekin egindako agerraldia, euskarazko eredu orokortu eta bakarra eskatzeko. Raul Bogajo / Foku Tamaina handiagoan ikusi

Berria -

2022ko otsailak 10

Ikastolen Elkarteak plazaratu du lehen iritzia. Euskarazko ereduaren zehaztapen faltan, euskal curriculumaren eta Euskal Herriaren aitortzan ikusi ditu hutsunerik handienak Eusko Legebiltzarreko Hezkuntza batzordeko buruak hezkuntza sistemarako hitzarmenaren oinarriak jaso dituen dokumentuan. Bestalde, begi onez ikusi ditu doakotasunari eta segregazioari buruz egiten dituen proposamenak. Dokumentua aberasteko ekarpenak egiteko prestasuna agertu du.

Uste du eredu berri baterantz egiteko garaia dela, «eztabaida antzuetan» erori gabe: «Gure iritziz, adostasun sozial berri bat eraikitzeko garaia da, denok batera hezkuntza eredu berri baterantz urratsak egiteko garaia da».

Ados dago denek eskubide eta betebehar berdinak izango dituzten puntuarekin. Halaber, bat egiten du doakotasunari buruzko proposamenarekin: «Bat egiten dugu ere Hezkuntza Zerbitzu Publiko horretan egongo diren ikastetxeek %100 finantzatuak egongo direla eta, ondorioz, zerbitzu publikoan dauden ikastetxeetan doakotasun erreala bermatuko dela dioen azalpenarekin». Baina betebeharren baldintzetan bakarra agertzea «harrigarria» egin zaie. «Segregazioa eta gizarte bazterketa gainditzeko ahaleginean aktiboki jarduten duten neurrian». Uler dezakegu lehenengo testuan konpromiso eta betebeharrak ez agertzea, baina ez dugu ulertzen baldintza bakar bat agertzea (baldintza horrekin ados egon arren)». Ikastolek aurkeztutako dekalogoan puntu hauek jaso zituzten: euskal curriculumean oinarritutakoa; euskara eta euskal kultura ardatz dituena; hezkidetza, laikotasuna eta inklusibitatean oinarritua; irabazi asmorik gabekoa, kudeaketa autonomo eta parte-hartze demokratikoarekin. «Uste dugu balio horietan guztietan oinarritutako zerbitzua beharko lukeela izan. Bereziki euskarari dagokionez, zergatik ez da ipintzen euskara segregazioaren parean? Horrelako esaldi baten bitartez izatea proposatzen dugu: '...betiere ikasleen euskalduntze ahaleginean aktiboki jarduten duten neurrian'».

Dokumentuak euskara ardatz duen sistema eleaniztunaren alde egiten du, baina aurreraxeago gehitzen du euskal hezkuntza dagoeneko euskara ardatz duen sistema eleaniztuna dela. Horrenbestez, ikastolen elkarteak uste du ez dela argi geratzen zein den aldea. «Hori, guretzat, ezinbesteko neurria da, askotan adierazi dugun moduan. Murgiltze eredua ezarriko den ala ez ere argitu beharra dagoela uste dugu; urteetan aldarrikatzen ari gara hau ere. Beraz, akordioarekin lege artikulatua jorratu ahal izateko, beharrezkotzat deritzogu hezkuntza-sistemak eredu orokortu eta bakarra izango duela berariaz jasotzea». Hezkuntza sistema ziklo berri batean sartzekotan, hizkuntzaren gaiari ere anbizio heltzea ezinbestekotzat dute: «Oinarrizko euskara-gaitasuna belaunaldi berri guztiei bermatuko dien eredu berri orokortua ezartzea da aukerarik justuena eta berdinzaleena, eta lehen akordio honek hori jaso beharko luke». Iazko abenduaren 16an aurkeztu zuen Kontseiluak Hezkuntzaren gehiengo sindikal eta eragileekin batera eskaera horixe egiten zuen adierazpena. Ikastolen elkarteaz gain, EHIGE, Kristau Eskolak, HikHasi, Heize, ELA, LAB eta Steilas zeuden akordioan, besteak beste.

Halaber, sumatu du ez direla aipatzen euskal curriculuma eta Euskal Herria: «Agerikoa da EAEn lantzen den Lege baten inguruan ari garela; hala ere, Ikastolok uste dugu gure gizarte osoan dagoen nahia bideratzeko ahalegina egin beharra dagoela. Eta horretarako bideak badaudela uste dugu: batetik, Euskal Herrian dauden ikastetxe guztien arteko harremanak bideratuz edo ikastetxeen arteko sareak hedatzea bultzatuz; eta, bestetik, Europa mailan dagoen legedia erabiliz, elkarlana sustatzeko erakundeak sortuz eta baliatuz, egungo errealitatetik abiatuta hezkuntza sistema propio bat Euskal Herri osoan eraikitzeko tresna izan daitekeena eta denontzat estrategikoak diren proiektuak bideratzeko balio dezakeena».

Segregazioaren inguruan egiten duen proposamena egokitzat jo du: «Eskolatzeko orduan herritar guztien aukera berdintasuna (baldintza berdinak bermatuz) eta hezkuntza eskaintzaren barruan ikastetxea hautatzeko eskubideak bermatzen dira... Biak».

Dokumentua jorratzen eta xehatzen segituko dutela iragarri dute, eta ekarpenak Eusko Legebiltzarrera igorriko dituztela esan dute, «guztion artean aberasteko».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ertzaintzaren auto bat, artxiboko irudi batean. ©MONIKA DEL VALLE / FOKU

Santurtzin hilik topatutako adingabe baten heriotza ikertzen ari da Ertzaintza

Jon O. Urain

Ostiralean zerraldo topatu zuten senideek. Ertzaintzak baieztatu du gorpuak kolpeak zituela eta litekeena dela horien ondorioz hil izana
 ©Andoni Lubaki / Foku

Suak zerua ilundu zuenekoa

Edurne Elizondo - Nafarroako Hitza

Suteek hagitz gogor jo dute Nafarroa, eta 14.500 hektarea inguru utzi dituzte kiskalita. San Martin Unx da suak inguratutako herrietako bat. Etxerik ez dute galdu, baina izua bazter uztea ez da erraza izaten ari herriko biztanleentzat. Suhiltzaileek, berriz, baliabiderik eza salatu dute.

Eva Isturiz, Nafarroako Berdintasun Institutuko zuzendaria, Iruñeko Sarasate pasealekuan. ©Idoia Zabaleta, FOKU

«Sexu erasoetan, biktimak bere buruari egotzi ohi dio errua»

Uxue Rey Gorraiz - Nafarroako Hitza

Festetako sexu erasoen kontrako aurtengo kanpaina aurkeztu du berriki Nafarroako Berdintasun Institutuak, Berridatz ditzagun jaiak lelopean. Erasoen gaineko aurreiritziak hautsi beharra nabarmendu du erakunde horretako zuzendari Eva Isturizek.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...