Albistea entzun

Osasungintza

Zortzi sindikatuk bat egin dute etziko osasun sistema publikoaren aldeko manifestazioarekin, Iruñean

LAB, ELA, CCOO, ESK, Steilas, CGT, Solidari eta CNT sindikatuek bat egin dute, etzi egingo den manifestazioarekin, 'Osasun publikoa defenda dezagun' lelopean, . Iruñeko Konstituzio plazatik abiatuko da, 19:00etan.

LAB, ELA, CCOO, ESK, Steilas, CGT, Solidari eta CNT sindikatuen prentsaurrekoa, gaur goizean.
LAB, ELA, CCOO, ESK, Steilas, CGT, Solidari eta CNT sindikatuen prentsaurrekoa, gaur goizean. LAB Nafarroa Tamaina handiagoan ikusi

Unai Etxenausia -

2022ko otsailak 16

LAB, ELA, CCOO, ESK, Steilas, CGT, Solidari eta CNT sindikatuek osasun publikoaren alde ostiralerako deituta dagoen manifestazioan parte hartzeko deia egin dute. Manifestazioa Iruñeko Konstituzio plazatik abiatuko da, 19:00etan, Osasun publikoa defenda dezagun lelopean.

Zortzi sindikatuek elkarrekin eman dute prentsaurrekoa gaur. Imanol Karrera Nafarroako LABeko bozeramaileak adierazi du pandemiaren bi urte hauetan Nafarroako Gobernuko Osasun Departamentuak ez duela izan «inolako estrategiarik osasun publikoaren gabeziak konpontzeko». Eta, ondorioz, salatu du osasuna arriskuan jarri duten eta langileak mugara eramaten dituzten gabeziak daudela: «Gobernuak gu zaintzeaz eta sendatzeaz arduratzen diren langileak zaintzeari utzi dio. Dramatikoa da langileen egoera, neke fisiko eta emozional izugarriarekin. Kontratatutako langileen egoera erabat prekarioa da».

Hauek dira, besteak beste, sindikatu horien aldarrikapenak: plantilla dimentsionatzea eta egonkortzea, behin-behinekotasun tasei aurre eginez, baliabide publikoen optimizazioa, eta diskriminazioen amaiera.

LABeko bozeramailearen ostean, Maider Huarte Osasunbidea ELAren arduradunak hartu du hitza. Azaldu duenez, Nafarroako Osasun Zerbitzuaren arazoak pandemia baino lehenagokoak dira. Are, bi arrazoitan laburbil daitezkeela esan du: «Alde batetik, Nafarroako osasun gastua BPGren %5ekoa da, eta Europako gastuaren batez bestekoa, berriz, %7. Bestalde, lan baldintzak langile gutxiegi, zaharkitu eta behin-behinekotasun izugarriarekin izateak markatzen ditu».

Huarteren esanetan, egoera horri aurre egiteko Nafarroako gastua Europako Batasunekoarekin parekatu beharko litzateke. Eta ohartarazi du UPN Nafarroako Gobernutik atera zenetik ez dutela zerbitzu publikoen aldeko apustu garbirik ikusi.

Osakidetzan ere

Osakidetzako sindikatuek ere protesta egin dute gaur. SATSE, ELA, LAB, CCOO eta UGT sindikatuetako ordezkariak elkarretaratzeak egin dituzte Santiago (Gasteiz), Gurutzeta (Bizkaia) eta Donostiako ospitaleen aurrean, baita hainbat osasun zentrotan ere. Argitu dute ez dutela tarterik ikusten otsailaren 25ean lehen mailako arretan eta 28an osasun sistema publikoan egingo diren grebak bertan behera uzteko, eta ohartarazi dute «benetako negoziaziorik ezean mobilizazio gehiago» izango direla.

Gabirel Perezek, SATSE sindikatuaren bozeramaileak, salatu du ez dutela onartuko osasuna «suntsitzea», eta gastu publikoa BPGaren %7 parekatzea zein gastu horren laurdena lehen mailako arretara bideratzea eskatu du. Horrez gain, esan du Osakidetzak asistentziaren kalitatea murriztu duela, eta Eusko Jaurlaritza enpleguaren kalitatearekin «jolasten» ari dela.

Jesus Oñate LABeko kideak Osakidetzaren negoziatzeko borondaterik eza kritikatu du, eta gogorarazi du azken hitzarmena duela 11 urte sinatu zela, Eusko Jaurlaritzak berrikusteko borondaterik izan gabe. Gainera, ziurtatu du «gutxienez 3.500» langile falta direla, eta profesional asko beste leku batzuetara joaten ari direla: Osakidetzak «tratu txarrak» ematen dizkielako «lan baldintza negargarriekin». Nabarmendu du Iñigo Urkullu lehendakaria eta Gotzone Sagardui Osasun sailburua direla egoera horren «erantzule».

Oñatek dei egin die berriro herritarrei grebekin bat egin eta haien osasun eskubideak aldarrikatzeko. «Osakidetzak benetako negoziazioa egiten ez badu, mobilizazioak eta grebak haziz joango dira», ohartarazi du.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Zaldibarko zabortegia, artxiboko irudi batean. ©JAIZKI FONTANEDA / FOKU

Zaldibarko zabortegia zigilatzeko eskatu dio Jaurlaritzak Verterri

Edurne Begiristain

Jaurlaritzak fiskaltzari jakinarazi dio Verter Recyclingek ez dituela egin behin betiko zigilatze lanak. Lege baliabideak abiatu ditu enpresak zor dizkion 28 milioi euro jasotzeko
Bidaiariak, maskara jantzita, Gasteizko tranbiara igotzen. ©JAIZKI FONTANEDA / FOKU

Gaurtik aurrera ez da maskara beharko garraio publikoan Hegoaldean

Jone Bastida

Indarrean da Espainiako Ministroen Kontseiluaren agindua. Optiketan eta ortopedietan ere ez da derrigorrezkoa, baina osasun zentroetan bai
Manifestazioaren antolatzaileak, aurkezpenean. ©BERRIA

NATOren eta EBren kontrako manifestazioa egingo dute Bilbon

Gotzon Hermosilla

Martxoaren 11n egingo dute, eta han «Euskal Herri antiinperialista» aldarrikatuko dute

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.