Albistea entzun

Mendebaldeko Sahara

Sanchezek Rabaten autonomia plana babestu izana gaitzetsi dute haren bazkideek

Aljeria «oso harrituta» dago Madrilen «bat-bateko» jarrera aldaketarekin. Mendebaldeko Saharako Errepublika Demokratikoak eta Fronte Polisarioak deitoratu egin dute Espainiako Gobernuak harturiko «erabaki penagarria». Pedro Sanchez Espainiako presidenteak Mohamed VI.a Marokoko erregeari bidalitako gutunaren arabera, Mendebaldeko Sahara Marokoko eremu autonomo bihurtzea da gatazka gainditzeko aukerarik «serioena, errealistena eta sinesgarriena».

Espainiako gobernuburu Pedro Sanchez eta Marokoko errege Mohamed VI.a. 2018an, Rabaten eginiko bilera batean.
Espainiako gobernuburu Pedro Sanchez eta Marokoko errege Mohamed VI.a. 2018an, Rabaten eginiko bilera batean. Ballesteros Tamaina handiagoan ikusi

Berria -

2022ko martxoak 19

Espainiako Gobernuak bat egin zuen atzo Marokok Sahara Mendebalderako 2007an proposatu zuen planarekin. Pedro Sanchez Espainiako presidenteak Mohamed VI.a Marokoko erregeari bidali zion eskutitzean adierazi zuenez, Madrilen iritziz Mendebaldeko Sahara Marokoko eremu autonomo bihurtzea da gatazka gainditzeko aukerarik «serioena, errealistena eta sinesgarriena». Sanchezek gaineratu zuen Espainiak «lagun eta aliatu batek merezi bezala» tratatuko duela Maroko.

Saharako Fronte Polisarioa autonomiaren planaren kontra agertu da beti, eta NBE Nazio Batuen Erakundeari eskatu dio bete dezala hark emandako hitza: Nazioarteko erakundeak Minurso misioa eratu zuen 1991. urtean, Sahara Mendebaldean autodeterminazio erreferendum bat antolatzeko.

Madrilen jarrera aldaketak erreakzio soka luzea ekarri du azken orduotan.

Mendebaldeko Saharako Errepublika Demokratikoak eta Fronte Polisarioak deitoratu egin dute Espainiako Gobernuak harturiko «erabaki penagarria», eta adierazi dute Marokoren plana «desbideratze arriskutsua» dela, eta nazioarteko legearen aurkakoa.

Atzo plazaraturiko ohar batean, harriturik agertu ziren Sanchezek harturiko jarrerarekin. «Ez du sinesgarritasunik, seriotasunik eta errealismorik». Haien arabera, okupazioa laguntzen du, eta zilegitasuna ematen dio «zapalkuntzari, gizateriaren aurkako krimenei eta Marokok Mendebaldeko sahararren ondasunak arpilatzeari».

Aljeria, bestalde, «oso harrituta» agertu da Moncloaren «bat-bateko» jarrera aldaketarekin, izan ere azken urteetan NBEren Nazio Batuen Erakundearen plana babestu baitu. Horregatik, Madrilen duen enbaxadorea deitu du.

Madrilek baieztaturiko jarrera erabateko aldaketa da. Espainiako Gobernuak, orain arte, Nazio Batuen Erakundearen itunak defendatzen zituen, erreferendum baten bide sahararrek euren etorkizuna erabaki zezaten. Nazioarteko erakundeek ez dute onartzen Maroko Mendebaldeko Sahararen gaineko jabetza.

Polisarioak esan duenez, Madrilek men egin die Marokoren presioei, «Rabatek hilabetez xantaia egin ostean».

Ikusteko dago zer eragina duen PSOEren erabakiak Espainiako koalizio gobernuan. Izan ere, haien bazkideek ez dute begi onez hartu erabakia.

Ezker Batuak, esaterako, «erabat arbuiatu» du Sanchezen jarrera aldaketa. Podemoseko Ione Belarrak adierazi du Espainiak ez duela «nazioarteko zuzenbidetik aldendu» behar, eta gogoratu du Nazio Batuen Erakundeak sahararren «determinazio askea» baino ez duela aurreikusten, gatazka konpontzeko.

Euskal Herrian ere erreakzioak eragin ditu erabakiak. Arnaldo Otegik adierazi du sahararrentzako «konponbide posible bakarra» autodeterminaziorako eskubidea bermatzea dela, NBEren erresoluzioei jarraiki. «Saharako herriak beti edukiko du geure baldintzarik gabeko sostengua».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Quad aliantzako lau herrialdeetako liderrak, gaur, Tokion ©EFE

Asia-Pazifikoan Txinari aurre egiteko neurriak adostu ditu Quad aliantzak

Igor Susaeta

AEBek, Indiak, Japoniak eta Australiak leporatzen diote Pekini Indopazifikoan 'statu quo'-a «indarrez» aldatu nahi izatea. Ohartarazi dute eskualdean ezin dela Errusiak Ukrainan egindako inbasioaren «antzekorik» gertatu.

Doktrinatzeko zentroetako ikasgeletako bat, artxiboko irudi batean. ©WU HONG, EFE

Txinako Polizia hackeatu, eta uigurren kontrako jazarpenaren datuak azaleratu dituzte

Uxue Rey Gorraiz

Zibererasoaren ondorioz, poliziek uigurrei ateratako 5.000 argazki baino gehiago gelditu dira agerian; irudiok 2018an ateratakoak dira. Giza Eskubideen Nazio Batuen goi mandataria Txinan da, giza eskubideen urraketak ikertzen saiatzeko.

Trenaren bosgarren zatia, Quintana Roo estatuan (Mexiko). ©LOURDES CRUZ / EFE

Ekosistemaren arnasari entzungor

Zuriñe Iglesias Sarasola

Mexikoko Tren Maiaren bosgarren zatian eraikuntza lanak behin-behinean etenda daude ingurumen kalteak direla medio. Greenpeacek gobernua salatu du legea «urratu» duelako.

Recep Tayyip Erdogan Turkiako presidentea AKP Justiziaren eta Garapenaren Alderdiko kideak agurtzen, lehengo astean. ©EFE

Erdoganek «pauso zehatzak» eskatu dizkie Suediari eta Finlandiari

Igor Susaeta

Ankarak esan du NATOn sartzeko «dudazko adierazpen diplomatikoak» alboratzeko. Helsinkik «askoz ere gertuagotik» gainbegiratuko ditu PKKren loturak. Errusiako soldadu bat bizi osorako zigortu dute

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...