Gipuzkoako zahar etxeetan egoitza eredu berria ezarri asmo dutela iragarri zuen foru aldundiak, eta asmo hori betetzekopausoa eman du: Adinberri zentroaren lanak lizitatu ditu, 59 milioi euroan. Gipuzkoako eredu berriaren arabera eraikitako belaunaldi berriko lehen erresidentzietako bat izango da Adinberri, Markel Olano ahaldun nagusiaren hitzetan. Zaharren eta menpekoen artan erreferentziazkoa izan nahi du Pasaian (Gipuzkoa) eraikiko duten egoitza horrek. Urte honen amaieran hasiko dituzte lanak, eta espero dute lau urtean amaitzea.
Adinekoentzako egoitza soil bat baino gehiago izango da: 124 lekuko zaharren egoitza «berritzailea», eguneko zentroa, tutoretzapeko hemezortzi etxebizitza, zahartzaroari lotutako I+G unitatea eta lur azpiko parkinga izango ditu. Pasaiako Trintxerpe auzoan eraikiko dute, baina Pasaialde osoarentzat onuragarria izango delakoan dago Olano: «Pasaialdearen berroneratzeari lagunduko dio; aurreikusita dago zuzeneko eta zeharkako 400 lanpostu sortzea». Horrenbestez, ahaldun nagusiaren hitzetan, «lurraldean ezartzen ari diren zaintza eredu berriaren erreferentzia nagusia» bihurtuko da Pasaia.
Olanok egoitza eredu berriaren aurkezpenean nabarmendu zuenez, garrantzitsua izango da erresidentzietan egoiliarrek «etxean» daudela sentitzea, eta «ez ospitalean». Horretarako, besteak beste, bizikidetza unitate txikiagoetan biziko dira: hamabost pertsona inguruko komunitateak ezarriko dituzte, gehienak banakako geletan biziko dira, eta espazio irekiagoak eta komunitateari lotuagoak izango dituzte. Arreta pertsonalizatuagoa ere jasoko dute egoiliarrek.
