Hego Euskal Herrian, gaurtik barrualdeko lekurik gehien-gehienetan ez da derrigorrezkoa maskara janztea. Lan munduan ere, oro har, ez da ezinbestekoa izango, baina enpresetako lan osasuneko prebentzio arduradunek neurriak har ditzakete. Osalan Laneko Segurtasun eta Osasunerako Euskal Erakundeak eman du gomendioa: enpresei esan die derrigortasuna kendu aurretik ebaluatzeko ea horretarako «baldintza egokiak» dauden.
Zeri erreparatu ere zehaztu dute: aireztapenari, enpresan dagoen jende kopuruari, segurtasun distantziari eta langileak lanpostuan egongo diren denbora kopuruari. Baina baita baldintza zehatzagoei ere: egiten den jarduerari, tenperaturari, hezetasun erlatiboari eta espazio komunen —aldagelak, jangela...— erabilerari.
Aparteko gomendioa egin die zaurgarriak diren langileei: esan die maskararen «erabilera arduratsua» egiteko beste batengandik 1,5 metro baino gutxiagora denbora luzez egon behar badute, eta gomendio bera egin diete «zaurgarritasun faktoreak» dituzten irakasleei ere. Halere, Osalanek gogorarazi duenez, lan eremuan orokorrean ez da nahitaezkoa maskara erabiltzea, gaur goizean kaleratu duten dekretuan zehaztutako kasuetan izan ezik, hala nola osasun zentroetako eta garraio publikoko beharginentzat.
