Albistea entzun

PEGASUS PROGRAMA

Kargudun publikoak «agindu judizialpean eta banaka» zelatatu zituela esan dute CNIren inguruko iturriek

'El País' egunkariak argitaratutako informazioaren arabera, argitara atera den informazioa ez da zuzena, eta zelatatutakoen zerrenda «askoz txikiagoa» da. Bolañosek esan du Espainiako Gobernuak «kontzientzia oso lasai» daukala

Felix Bolaños, gaur eman duen prentsaurrekoaren ondoren.
Felix Bolaños, gaur eman duen prentsaurrekoaren ondoren. J.J GUILLEN/EFE Tamaina handiagoan ikusi

Jone Arruabarrena -

2022ko apirilak 26

Agindu judizialpean zelatatu zituen CNI Espainiako zerbitzu sekretuak hainbat politikari euskaldun eta katalan, eta, gainera, banaka zelatatu zituzten, ez «bereizi gabe». Hori aldezten dute Espainiako zerbitzu sekretuen «hurbileko iturriek», El País egunkariak filtratutako informazioaren arabera. Egunkariak azaldu duenez, iturri horrek ez du baieztatu zeintzuk izan ziren, erakundearen arabera, zelatatu zituzten pertsonak. Hala ere, esan du The New Yorker kazetak argitaratu duen zerrendako asko ez dituztela zelatatu, eta, horrenbestez, espioitza kasuen biktima izan direnak askoz ere gutxiago direla.

Hala ere, iturri horiek onartu dute azken urteotan kataluniako elkarte independistetako buruak «jomuga informatibo» izan dituela CNIk. Esan dutenez, buruzagi independentistak zelatatzeak badu arrazoi bat: CNIko barne araudian ageri denez, «Espainiako lurraldetasuna edozein mehatxutatik babestea» da zerbitzu sekretuen helburuetako bat. Iturriek ez dute argitu Kataluniako Generalitateko lehendakaria izandakoren bat jomugatzat izan duten ala ez, baina esan dute atzemandako sakelakoak ez direla «instituzionalak» izan. Hau da, ez dira beren jarduera publikoak egiteko erabili diren sakelakoak, baizik eta telefono partikularrak, «indarkeria erabiltzen duten taldeekin harremanetan jartzeko» erabili direnak —esaterako, CDR Errepublikaren defentsarako batzordeak aipatu dituzte—. CNIren inguruko iturrien arabera, talde horiek zelatatzen ari zirela iritsi ziren kargu publikoen sakelakoetara, haiekin komunikatzen zirelako.

El Pais-ek informazio hori argitaratu ondoren, Jon Iñarrituk «erantzukizuna» eskatu dio Espainiako Gobernuari, SER irratian egin dioten elkarrizketa batean: «Ez dugu nahi gobernu hau pikutara joaterik, baina eskandalu honen aurrean ondokoa esan nahi diogu: jokatu erantzukizunarekin». Egunkariak argitaratutako informazioaren inguruan, gainera, Iñarrituk uste du gako batzuk ematen dituela Espainiako Gobernuak emango duen betsioaren inguruan: «Espioitza kasu batzuk gezurtatuko dituzte. Eskandalu bat da, eta ez dira argitzen ari horren atzean zer dagoen. Ziur nago ez dagoela baimen judizialik kargu publikoak edo abokatuak zelatatzeko».

«Barne ikerketa»

Kataluniako Generalitateko kontseilari Laura Vilagrarekin bilera egin zuen Felix Bolaños Espainiako Presidentetza ministroak igandean, gertatutakoaren inguruan hitz egiteko. Bilkuraren ondoren, espioitza kasu horiek argitzeko lau neurri iragarri zituen: barne ikerketa bat abiaraztea CNI Espainiako zerbitzu sekretuetan, Espainiako Kongresuan Sekretuen Batzordea eratzea, Espainiako arartekoari bidea erraztea berak ere gertatutakoa iker dezan, eta ikerketarako beharrezkoak diren dokumentuak desklasifikatzea.

Iñarrituri, ordea, ez zitzaion nahikoa iruditu neurri horiek hartzea, eta egoera horren arduradunak «atoan» kargutik kentzeko eskatu zuen. Bolañosek gaur eman du horri buruzko erantzuna, ministroen kontseiluaren osteko agerraldian: «Funtsezkoa da aurreiritzirik ez izatea, eta pausoz pauso joatea. Lehenengo eta behin, argitu dezagun CNI barnean gertatu dena». Horrez gain, gehitu du Espainiako Gobernuak «kontzientzia oso lasai» daukala, beti «legearen barruan» jokatu duelako. Horrez gain, sekretu ofizialen batzordea sortzeko beharrezkotasunaz ere hitz egin du Bolañosek: «Ez du ezertarako balioko gai honen inguruko ikerketa batzorde bat eratzeak. Bertan deklaratuko dutenek ezin izango dute ezer esan, sekretupeko informazioa delako».

Sekretupeko batzordea

Izan ere, Senatuko osoko bilkurak gaur eztabaidatu eta bozkatuko du gisa horretako ikerketa batzorde bat sortzea, Pegasus programaren bidez egindako espiotza kasu horiek ikertzeko. Senatuan ERC, JxCAT eta EH Bilduko 21 senatariek egindako eskaeraren harira aztertzen ari dira batzordea sortzea. Hala ere, alderdi horiei lau sinadura falta zitzaizkien ikerketa batzorde bat sustatzeko erregelamenduak eskatzen duen gutxienekora iristeko; EAJri eskatu zizkien falta ziren sinadura horiek— jeltzaleek hamar aulki dituzte—.

Horren ordez, Espainiako Gobernuak Sekretuen Batzordea sortu nahi du Kongresuan, espiotza kasu horiek ikertzeko. Orain arte, batzorde horretan parte hartzen duten alderdiak gehiengo kalifikatuaren bidez izendatzen ziren—erabaki jakin batzuk hartzeko lortu behar da gehiengo hori, eta gehiengo absolutuaren muga nabarmen gainditzen du—, baina orain, Meritxell Batet Espainiako Kongresuko presidenteak proposatu du batzordeko partaideak aukeratzeko metodoa aldatzea. Hain zuzen, gehiengo absolutuaren bidez aukeratzeko proposamena luzatu du; horrela, EH Bildu eta ERCk modua izango lukete batzordean parte hartzeko. Gobernuak, PSOEk eta Podemosek ekinaldi horren alde egin dute; Vox eta PP, ordea, aurka agertu dira.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

2021eko Ospa! eguna, Altsasun. ©Maialen Andres / FOKU

Ospa Eguna irailaren 3an egingo dute Altsasun

Oihane Puertas Ramirez

Espainiako polizia indarrak herritik joan daitezela eskatuko dute Altsasun, Poliziarik ez! Langileon aurkako errepresioa gelditu lelopean.

Etxeratek joan den astean Donostian egindako protesta. ©ANDONI CANELLADA/FOKU

Beste sei euskal preso jarri dituzte hirugarren graduan azken hilabetean

Berria

Guztira, 23 presori eman diete hirugarren gradua Eusko Jaurlaritzak espetxeen eskumena hartu zuenetik

Blboko agerraldia ©Monika del Valle / Foku

Preso eta iheslarien egoera «normalizatzeko» eskatuko dute manifestazio baten bidez

Gotzon Hermosilla

Sarek eta Bilboko konpartsek batera antolatuta, abuztuaren 26an egingo dute, Bilbon

Maia: «Prentsaren bidez izan dugu PPren erabakiaren berri»

Maia: «Prentsaren bidez izan dugu PPren erabakiaren berri»

Iñaut Matauko Rada

Maiak PPri egotzi dio koalizioa uzteko modua ez dela «egokia» izan. Esan duenez, Nafarroan zentro-eskuinaren liderra UPN izan da «historikoki», eta ez Alderdi Popularra, Telladok esan bezala

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...