Emakumezkoen eskubideak
Ogasun ministroa prest agertu da konpresen eta tanpoien BEZa jaisteko
Aurrekontuen proiektuan negoziatu nahi dute neurria, eta, ministroaren arabera, horrela Abortuaren Legean jaso izan balitz baino lehenago sartuko da indarrean. Negoziazioei «laster» ekitea espero du.
Abortuaren legearen aurreproiektua onartu berri dute Espainiako Gobernuko Ministroen Kontseiluan, baina bada bertan aurrera egin ez duen proposamen bat: hilekorako higiene produktuen BEZa murriztea. Aurrekontuen proiektuan, ordea, Maria Jesus Montero Ogasun ministroa produktu horien BEZaren beherapena negoziatzeko prest agertu da, eta nabarmendu du horrela abortuaren legean jaso izan balitz baino lehenago sartuko dela indarrean.
Ogasun Ministerioak bota zuen atzera, hain zuzen ere, abortuaren legearen aurreproiektuan BEZa jaisteko proposamena –%10etik %4ra jaisteko asmoa zuten–. Monteroren arabera, ez zuten onartu lege hori ez zelako zerga beherapena egiteko leku egokia, eta nabarmendu du neurria aurrekontu proiektuan adostu behar dela. Era berean, ministroak adierazi du espero duela «laster» ekitea negoziazioei.
Monterok azaldu duenez, neurria segurtasun juridikoarekin aztertzeko toki egokia aurrekontu proiektua da, eta adierazi du lehenago sartuko dela indarrean, abortuaren erreforma oraindik aurreproiektu bat delako. Izan ere, legearen aurreproiektuak organo aholku emaileetatik igaro behar du, Ministroen Kontseilura itzuli, eta, ondoren, parlamentuko tramitazioari ekin.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
