Antolatzaileek ez dute dudarik egin: iragan udazkenean Altsasun (Nafarroa) egindako topaketek izandako arrakasta ikusirik, ezinbestean behar zuten bigarren aldi bat. Premiazkoa zen segida bat. Gazte Topagune Sozialistaren aurtengo aldia aurkeztu dute berriki ekinbideko antolatzaile GKS Gazte Koordinakunde Sozialistak eta IA Ikasle Abertzaleek: udan eginen dute, uztailaren 20tik 24ra, Durangon (Bizkaia).
GKSk eta Ikasle Abertzaleek adierazi dutenez, hitzaldiak eta mahai inguruak izanen dira topaketen muina, «hausnarketa politikoa» zehaztu baitute lehentasun gisan. «Komunismoaren gaurkotasunaz» arituko dira, eta «gazteak independenteki antolatzeak eta eztabaidatzeko espazioa izateak daukaten garrantziaz». Halaber, argitu dute egungo krisialdian «askok» egin dutela «antolakuntza independente baten aldeko hautua»; gihartsu sentitzen dituzte beren buruak, beraz.
Hala eta guztiz ere, antolatzaileek zehaztu dute topaketetan izanen dela «aisialdirako eta ospakizunerako» aukerarik ere. Kontzertuak eta tailerrak eginen dituzte, besteak beste. Datozen asteetan plazaratuko dituzte egitarauaren gaineko xehetasunak, baita sarrerak erosteko deialdiak ere.
