Berriz goranzko erritmoa bizkortu dute prezioek maiatzean, Espainiarako inflazioren datu aurreratuak erakutsi duenez. Erregaiak eta elikagaiak izan dira jauziaren eragile nagusiak, eta urte arteko tasa %8,7ra eraman dute maiatzean; apirilean %8,3 zen.
Martxoan ia %10eko igoera izan zuen kontsumo prezioen indizeak; apirilean beheranzko joera hartu bazuen ere, ez du apaltzen segitu. Horrela, azken hamarkadetan izandako inflazio tasa handienak hor daude oraindik ere.
Azpiko inflazioa
Espainiako Estatistika Institutuaren arabera, erregaiak eta elikagai freskoak izan dira tasaren hazkundearen erantzule nagusiak, eta ez orain arte prezioen saskia garestitzen zuen argindarra.
Hala ere, energia prezioak eta elikagaiak (gai aldakorrenak) aintzat hartzen ez dituen azpiko inflazioak ere dezenteko jauzia eman du maiatzean, bost hamarren igota, %4,9raino. Datu hori ekainaren erdialdera berresten bada, Espainiak 1995. urteko urritik izandako azpiko inflaziorik handiena izango da.