Albistea entzun

Pentsioak

Kotizaziorik gabeko pentsioak %15 handitzea adostu du EH Bilduk Espainiako Gobernuarekin

Koalizio subiranistaren arabera, hilean 60-100 euro inguru igoko dituzte. Urte amaierara arte egongo da indarrean, eta 2023ko aurrekontuetan ere jasotzea aurreikusi dute.

Oskar Matute eta Iñaki Ruiz de Pinedo EH BIlduko diputatuak, Espainiako Kongresuan
Oskar Matute eta Iñaki Ruiz de Pinedo EH BIlduko diputatuak, Espainiako Kongresuan Mariscal (Efe) Tamaina handiagoan ikusi

Jokin Sagarzazu -

2022ko ekainak 3

Kotizaziorik gabeko pentsioek inoizko igoerarik handiena izango dute Hego Euskal Herrian. EH Bilduk Espainiako Gobernuarekin eginiko akordioari esker, %15 igoko dira: EH Bilduren kalkuluen arabera, mota horretako pentsioren bat dutenek hilero 60 eta 100 euro arteko igoera izango dute. Gutxienez 2022ko abenduaren 31ra arte egongo da indarrean neurria, eta Sanchezen gobernua konprometitu egin da 2023ko aurrekontuetako pentsioen errebalorizazioan ere jasotzeko, betiere koalizio subiranistaren arabera.

Gizarte Segurantzak mota horretako 15.592 pentsio ordaindu zituen guztira apirilean Hego Euskal Herrian, 410 euro ingurukoak batez beste. Kotizaziorik gabeko pentsioak 1991tik daude indarrean. Urte batzuetan, kotizazioen araberakoen gainetik egon dira, garaian garaiko gobernuaren beharren arabera; hala gertatu zen, adibidez, 2018an: %2,75 igo zituen Mariano Rajoyren gobernuak (PP), EAJrekin eginiko aurrekontu akordioari esker. Aurten, %4,5eko igoera izan zuten; kotizazioen araberakoek, %2,5ekoa.

Bata bestearen truke

%15eko igoera jasotzen duen neurria txertatuko da Espainiako Gobernuak Ukrainako gerra herritarren artean izaten ari den kostua arintzeko laster onartuko duen dekretuan. Eta, akordio horri esker, EH Bildu abstenitu egingo da pentsio funts publikoak arautuko dituen legearen tramitazioaren bozketan.

Arabako diputatu Iñaki Ruiz de Pinedok azpimarratu duenez, igoera onuragarria izango da Hego Euskal Herriko milaka pentsiodunentzat, «batez ere miseriazko pentsioak kobratzen dituzten emakumeentzat eta baliaezintasunen bat duten pertsonentzat». EH Bilduren arabera, «pentsiodunen mugimenduaren borroka nekaezinari esker» lortu da akordioa: «Badakigu ez dela nahikoa, baina ziur gaude neurri honek milaka eta milaka pentsiodunen egunerokoa zertxobait arinduko duela, merezi duten duintasunerako bidean aurrerapausoa baita».

Era berean, EH Bilduk «berme bat» lortu du Espainiako Gobernuak sortu nahi duen pentsioen funts publiko berria Gizarte Segurantzaren funtsekin finantzatzea eragozteko. Horren truke, EH Bildu abstenitu egin da lege proiektuari buruz batzordean eginiko bozketan. Eta, horri esker, Espainiako Gobernuak lortu du kongresuko osoko bilkuran eztabaidatu eta bozkatu ahal izatea. Egitasmo hori, beste batzuekin batera, ekainaren 30a baino lehen onartu behar du gobernuak, Bruselarekin hitzartutako pentsio sistemaren erreformaren beste mugarri bat gainditzeko.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Anton Arriola, Kutxabankeko lehendakari berria. ©Kutxabank.

Kutxabankek Anton Arriola izendatu du presidente

Iker Aranburu

Goldman Sachsen luze aritutakoa da Arriola. Bankuaren «berezitasunari» eusteko konpromisoa hartu du.

Pentsiodunen protesta bat, Iruñean, artxiboko irudi batean. ©VILLAR LOPEZ / EFE

Pentsioak %8,5 handituko dira urtarrilaren 1ean Hego Euskal Herrian

Iker Aranburu

Iaz ez bezala, aurten batez besteko pentsioa handiagoa izango da urte amaierakoa baino. Batez besteko pentsioa 115 euro handituko da, eta erretiratuena 128 euro
Jose Luis Escriva Espainiako Gizarte Segurantza ministroa ©Sergio Perez (Efe)

Kotizazio urte gehiago, baina «hoberenak»

Jokin Sagarzazu

Pentsioen kalkulua 25 urtetik 30era zabaltzea proposatu du Espainiako Gobernuko Gizarte Segurantza ministroak

Bizkaiko metalgintzako lehen greba eguna, atzo, Trapagaranen. ©Marisol Ramirez / FOKU

Langile gehienek babestu dute metalgintzako bigarren greba eguna

Iñaut Matauko Rada

ELAk adierazi du grebaren atzoko eta gaurko erantzuna oso antzekoak izaten direla Bizkaiko metalgintzan. CCOO, LAB eta UGTren arabera, %85eko erantzuna izan du gaurko greba deialdiak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...