Albistea entzun

Erabakitzeko eskubidea

Madrili «beto» eskubidea eman izana leporatu dio Iriartek Urkulluri

EH Bilduko eledunak salatu du Jaurlaritzak uko egin diola Europari argitasun zuzentarau bat eskatzeari. Urkulluren hitzetan, beste ate batzuk irekitzea da asmoa.

Maddalen Iriarte, Eusko Legebiltzarrean, gaur goizean.
Maddalen Iriarte, Eusko Legebiltzarrean, gaur goizean. Raul Bogajo / Foku Tamaina handiagoan ikusi

Iosu Alberdi -

2022ko ekainak 3 15:31

EH Bilduko eledun Maddalen Iriartek leporatu dio Eusko Jaurlaritzako lehendakari Iñigo Urkulluri Euskal Herriaren subiranotasunaren inguruko jarrera «otzandu» izana. Zehazki, uste du gobernuak uko egin diola Europako Batasunari kontsulta subiranisten inguruko argitasun zuzentarau bat eskatzeari, eta Espainiaren esku utzi duela afera. Urkulluren esanetan, baina, Jaurlaritzak aukerak «zabaldu» ditu azken proposamenarekin.

Urkulluk Korsikatik eskatu zion Espainiari «estatuaren eredu berri bat» lortzeko urratsak egiteko, «lurralde desadostasunari» eta «estatu ereduaren krisiari» erantzuteko. EH Bilduko eledunaren iritziz, baina, Madrilera gehiegi begiratzen ari da lehendakaria, eta jokabide horrek Espainiari azken hitza izateko aukera ematea dakar: «Zure gobernuarentzat, Espainiak betoa ezartzeko boterea du euskal gizarteak etorkizunari buruz egin dezakeen edozein akordioren inguruan».

Beraz, Iriartek salatu du «atzerapausoak» eman dituela Jaurlaritzak «Euskal Herriaren burujabetzaren defentsan», erreferendum bati bide emateko Europari eginiko eskaerak Espainiaren balizko adostasun batekin lotu dituelakoan. Modu horretan Euskal Herriaren eskubideak «gutxiesten» dituela leporatu dio, baita erabakitze eskubidea aldarrikatzeak «haustura guneak» eragingo dituela asumitu izana ere.

EH Bilduko bozeramaileak adierazi du «subiranotasun materialez eta botere politikoz» jabetzeko unea dela: «Inor bazterrean utzi gabe, baina erreferentziarik gabe, inoren betorik onartu gabe». Hala, Urkulluri gogoratu dio Eskoziako erreferendumak erakutsi zuela bide horretan urratsak egiteko modua badagoela. Kontrara, Espainiari «gero eta gehiago obeditzeak» PSE-EEk gero eta eskaera gehiago egitea dakarrela uste du.

Izan ere, azken egunetan EAJko eta PSE-EEko gobernukideen artean talka eragin du subiranotasunaren inguruko aferak. Jeltzaleek Urkulluren proposamena defendatu dute, EAJk eta PSOEk Espainiako Gobernuko presidente Pedro Sanchezen inbestidurarako egindako akordioak hura babesten duelakoan. Sozialistek, baina, uko egin diote bide horretan urratsak egiteari, argudiatuta Eusko Jaurlaritzako gobernu itunak ez duela halakorik jasotzen.

Aukera gehiago

Urkulluren esanetan, helburua da mekanismoak ezartzea bermatzeko Europako Batasuneko estatu kideetako eta haien barruko «komunitate politikoetako» parlamentuek hartutako erabakiak errespetatuko direla, haiek «parte diren estatu kideko subiranotasun, subiranotasun partekatu edo interdependentzia estatusaren gainean erabakitzeko asmoa» adierazten dutenean. Horretarako, argitasun zuzentaraua tresna posibleetako bat da, lehendakariaren hitzetan, baina ez bakarra: «Kontua ez da ateak ixtea eta aukera bakar batera mugatzea».

Horrek, baina, ez du bat egiten EAJren Euzkadi Buru Batzarreko presidente Andoni Ortuzarrek aurrez esandakoekin. Hark espresuki adierazi zuen jeltzaleek eskatzen dutela «Europako Batasunaren araudiaren barruan argitasun zuzentarau bat jasotzea»: «Europako Batasunarekiko duten estatusari buruz erabakitzeko borondatea argi eta garbi eta zalantzarik gabe adierazten duten erkidego politikoek beren etorkizunari buruz herritarrei galdetzea ahalbidetzen duten mekanismoak izan ditzaten». Hala adierazi zuten jeltzaleek Europaren Etorkizunari Buruzko Konferentzian ere.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JON URBE / FOKU

«Ez genuen espero, identifikazio saioa egitea beti ukatu baitigute»

Xabier Martin

Merinok ez zuen espero, 40 urte pasatuta, segadan parte hartu zuten poliziak identifikatzeko saio batera deituko zutenik. Fisikoki aldatu arren, Merino ziur dago aurpegiez: «Haien eskuetatik pasatu garenok badakigu».

Gregorio Eskuderoren aldeko manifestazioa, gaur, Orion. ©Gorka Rubio / FOKU

Gregorio Eskudero 70 urteko presoa Euskal Herriratzeko eskatu dute Orion

Berria

Eskuderori hirugarren gradua ezartzeko ere eskatu du Sarek. Orain, Dueñaseko (Espainia) kartzelan dago preso, lehen graduan.

Plaza Hutsan 350 lagun baino gehiago elkartu dira. ©SORTU

«Herrigintza aro berri bat pizteko oinarria» jarri du Sortuk Burlatan

Mikel Elkoroberezibar Beloki

Plaza Hutsa bete dute 350 lagunek baino gehiagok, herrigintzaren eta estrategia independentistaren arteko lotura sakontzeko helburuarekin.

Urkulluk ukatu egin du epaiek hizkuntz politikan eragin izana

Urkulluk ukatu egin du epaiek hizkuntz politikan eragin izana

Iosu Alberdi

Euskararen kontrako «erasoei» aurre egiteko, hizkuntzaren inguruko herri akordio bat proposatu dio EH Bilduk Eusko Jaurlaritzari

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.