Euskal Sagardoa jatorri deiturak 2021eko uztaren emaitzak aurkeztu ditu goizean, Bilboko Guggenheim museoan: guztira, 3,5 milioi litro ekoitzi dira, 2020an halako hiru —1,2 milioi izan ziren orduan, kopuru «ezohikoa»—. Uzta «oparoa» izan da, jatorri deiturako lehendakari Oihana Ganzerainen hitzetan, eta, horri esker, askotariko barietateak erabili, nahasi eta estilo propioak garatzeko aukera izan dute sagardogileek: orotara, 75 sagardo mota aurkeztu dituzte. Dibertsifikazioa gorabehera, edarien ezaugarri komunak aipatu ditu lehendakariak: «Oro har, orekatuak eta lurrintsuak dira, eta aurreko uztakoek baino alkohol gutxiago dute».
Ohiz Gipuzkoan antolatzen dute aurkezpen ekitaldia, baina aurten Bizkaian egitea erabaki dute. Izan ere, Euskal Sagardoa jatorri deitura osatzen duten 49 sagardogileetatik, gehien-gehienak gipuzkoarrak dira (43), baina lau Bizkaikoak dira, eta Araban beste bi daude. Hori horrela, mezua beste lurraldeetara ere zabaltzeko asmoz egin dute ekitaldia Guggenheimen, jatorri deituraren koordinatzaile Unai Agirrek adierazi duenez.
Hori baita elkartearen erronka nagusietako bat: kokapena hobetzea. Eta, ildo horretatik, ostalaritza ere badute jopuntuan. «Sagardoak lekua izan dezake edozein mahaitan; aldarrikatu nahi dugu kalitate handiko produktua dela». Edariaren presentzia jatetxeetan eta tabernetan sustatzea dute xede, hala nola sagardoen karta propio bat lortuta. Horretarako, kontsumoari erreparatuko diote: esaterako, edaria kopetan aurkezten hasi dira, ohiko basoetan atera beharrean.
Euskal Sagardoaren bestelako ekintzetan ere ostalaritzarekiko harremanak landuko dituzte: esate baterako, Sagardoa Routen, sektoreko agentzia estrategiko eta turistikoan. Amaia Zubeldia koordinatzaileak azaldu duenez, mota askotako ekintzak antolatzen dituzte, hala nola dastaketak upategietan, eta kirolarekin edota kulturarekin lotutako egitasmoak, baina ostalaritza da haien «erronka nagusia». Ekintzok jatetxeetan eta tabernetan ere antolatzen hasi nahi dute.
Bost urteko bidea
Euskal Sagardoaren ekoizleek hiru lurraldeetako sagarrak erabiltzen dituzte edariak egiteko. Zehazki, 250 ekoizlek hornitzen dituzte, eta aurten sei milioi fruitu erabili dituzte guztira. Agirrek azaldu duenez, nagusiki 106 barietate erabiltzen dira, eta, batez ere, 24. «Genetikoki parekorik gabeko barietateak dira; Europan ez dago antzeko genomarik duenik».
Jatorri deitura duela bost urte sortu zuten, Eusko Jaurlaritzaren eta hiru lurraldeetako foru aldundien babesarekin, eta ibilbidea ontzat jo du Bittor Oroz Jaurlaritzako Nekazaritza, Arrantza eta Elikadura Politikako sailburuordeak. «Ondo kohesionatutako eta koordinatutako taldea da. Horretarako, jatorri izendapena ezinbestekoa da».
Agirrek iragarri duenez, adituek dagoeneko egin dituzte 2022ko uztaren aurreikuspenak, eta iazkoa baino urriagoa izango dela uste dute. Edonola ere, 2020koa baino oparoagoa.
