CAFek kontratu bat sinatu du Frantziako Montpellier hiria eta haren inguruak tranbiaz hornitzeko. Gutxienez hirurogei tranbia biltzen ditu kontratuak –beste hamazazpi ere aurreikusi dituzte–. Guztizko zenbatekoa 200 milioi euro baino gehiagokoa da. Urbos plataformako zazpi moduluko tranbiak fabrikatuko dituzte.
CAF taldeak Transports de l'Agglomeration garraio publikoko enpresarekin sinatu du kontratua, mugikortasun plan berri batean. Helburua da garraio publikoa «pixkanaka doako» bihurtzea eta jasangarriagoa eginez Montpellierreko metropoliko bizi kalitatea «nabarmen hobetzea». Trenbiei dagokienez, CAFek aurten Frantzian sinatu duen kontraturik handiena izan da. Montpellier hiriburu duen metropoliak 31 udalerri ditu, eta milioi erdi inguruko biztanleria du.
Azken urteotan ere kontratu ugari lortu du han: Pariseko RER B aldiriko linearako 146 trenen hornidura; 28 treneko kontratua SNCF enpresarentzat –beste 75 egiteko aukera biltzen du–; Naoned, Besançon eta Sain Etienne hiriak tranbiaz hornitzeko proiektuak; eta Lyoneko metroko linea bateko ibilgailuak zaharberritzekoa.
