RTVErekin lortutako elkarlan hitzarmen bati esker, ETB1ek Iruñeko sanferminetako entzierroak emango ditu aurten. Entzierroa saioa goizero emango dute, uztailaren 7tik 14ra (07:45ean hasiko da emankizuna). Nerea Reparaz eta Joseba Olagarai kazetariek aurkeztuko dute programa hori. Bestalde, Leire Martinez eta Albina Stardust kazetariak kaleko jai giroa jasotzen eta herritarren iritziak biltzen arituko dira.
Uztailaren 6an, sanferminetako txupinazoa ere ETB1en ikusi ahalko da; Martxelo Sotesek eta Ilaski Serranok aurkeztuko dute, eta Egoitz Txurruka arituko da kaleko giroaren berri ematen.
Edozein herriko... gauetako saioa Iruñeko Baluarte inguruan jarritako platoan egingo dute. Suak ere emango dituzte hilaren 9an, 10ean, 12an eta 13an.
Uztailaren 7an, Baluarte jauregian bertan egingo dituzte ETBko albistegiak.
ETB1ek, bestalde, igande honetan Zer ote ziren sanferminak? dokumentala estreinatuko du, 22:15ean. Pablo Iraburu zinemagileak zuzendu du, eta lau ekoiztetxeren artean egin dute: Arena, Labrit, Calu Creative eta 601. Gaizka Arangurenek aurkezle lanak bete ditu.
TVEko entzierroetan, Iantzi
TVEn, berriz, entzierroen esatariak Julian Iantzi, Ana Prada eta Teo Lazaro izango dira. 40 urte dira Espainiako telebista publikoa sanferminak ematen hasi zenetik. Lazaro urte luzez aritu da entzierroetan korrikalari, eta entzierroen analisia egingo du La1 kateko emankizunean. Entzierroen ibilbidean, TVEk 32 kamera izango ditu jarriak. Ehun langile arituko dira sanferminen berri ematen TVErentzat.
