Britainia Handiko 1 Formulako sari nagusia martxan zela, bost lagun sartu ziren atzo Silverstoneko zirkuitura, Birminghamen, Southamptonen, Essexen eta beste hainbat hiritan egin asmo dituzten petrolio findegien aurka protestatzeko. Guanyu Zhou gidariak istripu bat izan zuen, eta lasterketa etenda zegoen unea aprobetxatu zuten Just Stop Oil taldeko ekintzaileek pistara salto egin eta errepide erdian jartzeko. Berehala atera eta atxilotu zituzten denak.
Erregai fosilen erabileraren aurkako mugimendu ekologista bat da Just Stop Oil; zehazki, Erresuma Batuan dozena bat petrolio findegi eraikitzeko proiektuaren aurka ari dira. Aldarri horri eusteko, aurrerantzean ere kirol eta kultur ekitaldien aurka egiten jarraituko dutela ohartarazi dute ekintzaren ondoren.
A group of supporters of Just Stop Oil have stormed the track at #BritishGP2022
— JustStopOil (@JustStop_Oil) July 3, 2022
If you are more outraged about this disruption than our world being burnt before our eyes, then you need to get your priorities straight. pic.twitter.com/lg44Uaj8nc
Hiru egunez, 400.000 lagun bildu ditu Silverstoneko 1 Formulako sari nagusiak. Poliziak bazuen susmoa zirkuitua hartzeko planak egiten ari zirela, eta ekitaldiaren arduradunek eskatu zuten halako «arriskurik» ez hartzeko. «Oso arriskutsua da pistan sartzea autoak martxan dauden bitartean», adierazi zuten, eta prest agertu ziren ekintzaileekin «protesta baketsu bat» egiteko modua adosteko. Just Stop Oil taldeko kideek, ordea, aurrera egin zuten protestarekin, eta zirkuituaren erdira sartzea lortu zuten azkenean. Ez zen inor zauritu.
