Albistea entzun

Frantzia

Bornek konpromisoa eta akordioak eskatu dizkie oposizioko alderdiei

Frantziako lehen ministroak EDF erabat publiko bilakatzeko asmoa jakinarazi du politika orokorreko saioan. Parisek eta Aiacciuk «datozen egunetan» ekingo diete berriz Korsikaren autonomiari buruzko elkarrizketei.

Elisabeth Borne Frantziako lehen ministroa, gaur, Asanblean.
Elisabeth Borne Frantziako lehen ministroa, gaur, Asanblean. EFE Tamaina handiagoan ikusi

Ander Perez Zala -

2022ko uztailak 6 09:46

Frantziako oposizioa harrotuta dago. Indartuta sentitzen da. Ez da gutxiagorako, gobernuak ez baitu gehiengo osorik Asanblean —49 diputatu falta zaizkio horretarako—, eta kontra dituen alderdiekin izan dituen lehen negoziazioek ez baitute arrakastarik izan. Ezkerrak, eskuinak eta eskuin muturrak Elisabeth Borne lehen ministroari eta haren lantaldeari egunerokoa zailtzeko helburu argia dute, horien etorkizunak eta gobernabideak dena baitute kontra. Hasiera, behintzat, ez da erraza izan gobernuburuarentzat: politika orokorreko saioan, haren diskurtsoak aurrera egin ahala, geroz eta indartsuagoa izan da oposizioko diputatuen oihukaldia. Baita gobernuaren eta bere proiektuen kontrako mezuak ere.

Bornek hasi berria du agintaldia, baina hori ez da espero bezala abiatu. Asanblearako bozetan gehiengo osoa galdu izanak nabarmen ahuldu du lehen ministroa, baita haren autoritatea ere, eta gobernuaren osaketaren inguruko eztabaidek eta polemikek are gehiago okertu dute orain arteko egoera. Oposizioak, gainera, ez die erabat luzatu eskua hari eta Emmanuel Macron Frantziako presidenteari, eta Bornek testuinguru negatibo horretan aurkeztu behar izan ditu agintaldirako asmoak.

Lehen ministroak etengabe defendatu du bere burua, aurrean izan duen errieta Asanblean aspaldian ikusitako handiena izan baita. Ia minutuero jaso du oposizioko diputatu baten oihu bat edo kritika bat; halere, lehen ministroak, ahal izan duen bakoitzean, konpromisorako eta akordioetarako beharrean jarri du arreta, argudiatuta herritarrek ez dutela desegonkortasunik nahi printzipioz bost urte iraungo duen legealdirako.

Eta Bornek baditu identifikatuak aliatu posibleak oposizioko indarren artean, banan-banan aipatu baititu hitzaldian: Olivier Marleix LR Errepublikanoen talde parlamentarioko burua; Julien Bayou ekologistena; Boris Vallaud sozialistena; eta Bertrand Pancher LIOT Askatasunak, Independenteak, Itsasoz Haraindia eta Lurraldea taldekoa —zenbait autonomista eta independentista daude horretan—. Laurek harrituta erreakzionatu dute norbere izen-abizenak entzun dituztenean.

Lehen ministroak eskua luzatu die berriz ere agintari horiei —eta ez LFI Frantzia Intsumisokoari, PCF Frantziako Alderdi Komunistakoari eta RN Batasun Nazionalekoari—, «desafioen aurrean desegonkortasuna eta ordenarik eza ez baita aukera bat», argudiatu duenez. Haren arabera, gehiengo osorik gabe, «proiektuen gehiengoen garaia» hasi da Frantziako politikan, eta, esaldi horrekin, agerian utzi du bihartik aurrera hasiko dela zailena harentzat.

Besteak beste, lehen ministroak jakinarazi du Frantziako Estatuak «asmoa» duela EDF Electricite de France argindar konpainia erabat publiko bilakatzeko, eta erretreten erreformaz orain artekoa berretsi du: «Progresiboki pixka bat gehiago egin beharko dugu lan». Hau da, erretiroaren adina atzeratu nahi dutela, pixkanaka.

Erakundeez ere aritu da, eta horiek «erreformatzeko» asmoaz: irailetik aurrera, martxan jarriko dute hori lantzeko batzorde bat, eta Bornek nahi du oposizioko alderdiek ere parte hartzea eztabaidan.

Eskua luzatuta, baina ia hutsik

Lehen ministroak behin eta berriz luzatu die eskua oposizioko indarrei konpromisoa eta itunak eskatuz, baina, zenbait iragarpenez gaiz, Bornek ez ditu erreforma eta neurri berri asko jakinarazi. Hori egin ez, eta arreta jarri du elkarrizketaren beharrean eta «hobeto hitz egiteko» helburuan; eta, batez ere, «elkarrekin eraikitzeko» asmoan.

«Denen proposamenak entzuteko prest gaude; baita eztabaidatzeko eta gure proiektuari zuzenketak aurkezteko ere», azaldu du lehen ministroak horretaz aritu denean.

Elkarrizketa horietako batzuk Korsikaren etorkizun instituzionalaz izango dira, eta, zehazki, balizko autonomia estatusaz. Bornek jakinarazi duenez, «datozen egunetan» ekingo diote berriz solasaldi horri, eta espero da Gilles Simeoni Korsikako gobernuburua Gerald Darmanin Frantziako Barne ministroarekin batzartuko dela —France 3 Corse Via Stella telebista katearen arabera, ez da hilaren 14a baino lehen izango—. Gerora, Darmanin Mediterraneoko irlara joango da hilabete «amaieran», Barne ministroak berak atzo jakinarazi zuenez.

Kaledonia Berriaren geroari buruzko negoziatzaileetako bat ere izango da Darmanin. Frantziako Barne ministroak BFMTV telebista katean atzo azaldu zuen «behar duen denbora guztia» hartuko duela independentistekin eta loialistekin eztabaidatzeko, eta uhartediaren «etorkizun instituzionala eraikitzeko». Ozeaniako uhartedi horretara joango da hilaren 26an, Jean-François Carenco Itsasoz Haraindiko ministroaren ordezkariarekin.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Raila Odinga presidentegaiaren jarraitzaileak, Nairobin. / ©Daniel Irungu, EFE

William Rutok irabazi ditu Kenyako presidentetzarako hauteskundeak

Arantxa Elizegi Egilegor

Hauteskunde Batzordeko zazpi kideetatik lauk uko egin diote emaitzak onartzeari. Raila Odingaren jarraitzaileek protesta egin dute batzordeko kideak bilduta dauden hotelaren atarian.

Nicola Sturgeon lehen ministroa, Eskoziako Parlamentuan. ©FRASER BREMNER/SCOTTISH DAILY MA

Hilekoarentzako produktuak doan banatuko ditu Eskoziak gaurtik aurrera

Berria

Gaur sartu da indarrean Hilekoarentzako Produktuen Legea, Eskozian. Udalek eta eskolek banatuko dituzte tanpoiak eta konpresak, eta eskatzen dituen ororentzat eduki beharko dituzte eskuragarri, doan.

Guayaquil hirian igande goizaldean izandako atentatua. ©Guayaseko gobernua.

Bost lagun hil dituzte Ekuadorren, lehergailu batekin egindako atentatuan

Hodei Iruretagoiena

Ekuadorko Gobernuak salbuespen egoera ezarri du Guayaquil hirian, 30 egunerako, «hiria babesteko eta kontrola berrezartzeko beharrezko neurri guztiak» hartzeko.

Israelgo Polizia, atzo, Jerusalem ekialdean. / ©Abir Sultan, EFE

Palestinar bat hil du tiroz Israelgo armadak

Arantxa Elizegi Egilegor

Jerusalem ekialdean egindako sarekada batean hil dute 21 urteko gizonezkoa.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...