Emmanuel Macron Frantziako presidenteak parlamentuko gehiengoaren ezezkoa jaso zuen bart Asanblea Nazionalean. Diputatuek aurrez onartutako COVID-19aren inguruko neurria berrezartzearen aurka bozkatu zuten. Atzerritik Frantziara sartzeko eta itsasoz bestaldeko lurraldeetara joateko COVID ziurtagiria eskatzea zuen helburu. Araua ez zen begi onez ikusi parlamentuan, ordea, eta 221 diputatuk ezezkoa bozkatu zuten. 187 izan ziren neurriaren alde bozkatu zutenak, eta 24, berriz, abstenitu egin ziren.
François Braun Osasun ministroa triste agertu da gaur goizean porrotagatik. «Herritar frantsesak babesteko» arau bat dela eta parlamentuan hartutako erabakia gaitzesten duela adierazi du RTLk egindako elkarrizketan. Hala ere, Senatura pasatuko da orain neurria, eta «araua onartzeko borrokan» jarraituko duela jakinarazi du.
Elisabeth Borne Frantziako lehen ministroa ere haserre agertu da erabakia dela eta. Bere Twitter kontuan adierazi duenez, «herritar frantsesak babesteko arauaren aurka biltzearen ondorioz, Frantzia Intsumisoa, Errepublikanoak eta Errepublika Martxan alderdi politikoek birusari aurre egiteko kontrola galarazten dute mugan».
L’heure est grave. En s’alliant pour voter contre les mesures de protection des Français face au Covid LFI, les LR et le RN empêchent tout contrôle aux frontières face au virus.Passée l’incrédulité sur ce vote, je me battrai pour que l’esprit de responsabilité l’emporte au Sénat.
— Élisabeth BORNE (@Elisabeth_Borne) July 12, 2022