Tenperaturak gora egiten ari dira gaur Euskal Herrian, eta ostegunera arte abisuak piztu dituzte Hego Euskal Herrian, beroagatik eta sute arriskuagatik. Nafarroan, tenperatura altuenak gaur eta etzi erregistratuko dira, eta Erriberan eta Lizarraldean 40 gradu zentigradura iritsiko dira. Araban ere tenperatura altuengatik alerta dago piztuta gaurko eta biharko. Gasteizen, 35 gradura iritsiko dira gaur eta bihar, eta Guardian (Araba), berriz, 38ra.
Sute arriskuari dagokionez, AEMET Espainiako Meteorologia Agentziaren arabera, sute arriskua «oso handia» izango da gaur, bihar eta etzi Hego Euskal Herrian. Euskalmet agentziak alerta horia piztu du Araban, sute arriskua dela eta.
