Suhiltzaileek lanean jarraitzen dute atzo arratsaldean Zanbranan (Araba) piztutako sutea itzaltzeko. Gainera, azken orduetan okerrera egin du: Arabako Foru Aldundiak jakinarazi duenez, beroak eta batez ere haize indartsuak hauspotu dute sua bi guneetan.
Igandean piztu zen sua, 16:30 aldera, Santa Cruz del Fierro eta Ozio herrien artean, eta piztuta zegoen oraindik gaur goizean. 11:00 pasatxo zirela, kontrolatuta zeukaten. Goizean Zanbranako alkateak esan duenez, lehen hipotesien arabera, auto batetik botatako zigarrobatek eragin zuen sutea. Arabako suhiltzaileen buru Alberto Amenabarrek, ordea, Euskadi Irratian esan du baserri batean sortu dela sutea, eta ikertu ondoren argitu beharko dela zergatik piztu den.
Seguimos trabajando en el incendio de Santa Cruz de Fierro pic.twitter.com/rVz0E4fYuc
— Arabako Foru Suhiltzaileak (@BomberosAraba) August 8, 2022
Arabako suhiltzaileekin batera, Nafarroakoak eta Burgoskoak ere ari dira sutea itzaltzeko lanean; besteak beste, helikoptero batekin. Ozio eta Zanbrana arteko A-3126 errepidea itxi behar izan dute, 31. kilometroan.
