Migratzaileak

Dozenaka migratzaile desagertu dira Egeo itsasoan, txalupa iraulita

Greziako kostazainek 29 lagun erreskatatu dituzte bizirik, eta gehiagoren bila ari dira. Turkiako Antalya hiritik irten zen txalupa, 80 pertsona ingururekin.

Egeoan erreskatatutako migratzaile talde bat Kios irlan lehorreratzen, artxiboko argazki batean. PANTELIS FYKARIS, EFE
arantxa elizegi egilegor
2022ko abuztuaren 10a
10:51
Entzun

Dozenaka dira desagertuta dauden migratzaileak, euren txalupa Egeo itsasoan irauli ostean. Greziako kostazainen arabera, 29 pertsona erreskatatu dituzte orain arte, eta gehiagoren bila ari dira. Migratzaileek eurek azaldu dutenez, Turkiako Antalya hiritik irten zen txalupa, eta 60 eta 80 pertsona artean zihoazen bertan. Italiara iristea zuten helburu.

Ontzia Karpathos uhartetik gertu irauli da, Egeo itsasoko hegoaldean. Erreskate lanak goizeko lehen orduan hasi dituzte, baina, Nikos Kokkalas bozeramaileak azaldu duenez, itsaso zakarrak zaildu egiten ditu lanak. Orain arte erreskatatutako migratzaileak Irakekoak, Afganistangoak eta Irangoak dira.

2015 eta 2016 urteen artean milioika pertsona heldu ziren Greziara Siriako gerratik ihesi. Geroztik nabarmen murriztu da kopurua, baina Atenasek ohartarazi du gero eta gehiago iristen ari direla azken hilabeteetan. Migratzaileentzako Nazioarteko Erakundearen arabera, urtea hasi zenetik mila pertsona baino gehiago hil dira Mediterraneoa zeharkatzeko ahaleginetan; horietatik 64 inguru, Egeo itsasoan.

Bestalde, MSF Mugarik Gabeko Medikuak erakundeak jakinarazi du urte hasieratik 570 migratzaile artatu dituela, eta horietako gehienek salatu dutela legez kanpo itzularazi zituela Greziako Poliziak, baita tratu txarrak jasan zituztela ere. Erakundeak zabaldutako komunikatuaren arabera, Turkiatik irten ziren guztiak, Greziara iristeko asmoz, baina, bidean, Greziako Poliziak atzeman egin zituen, eta «jipoitu, indarrez miatu, lapurtu eta itsasoan abandonatu».

Joan den apirilean, larrialdiko arta eman behar izan zion erakundeak Poliziatik ihesi labar batera erori zen talde bati. Haietako batek salatu zuen bederatzi alditan itzuli zutela Turkiara, eta haietako batean beste hainbat migratzailerekin batera eraikin batera sartu eta jo egin zituztela.

Greziako Gobernuak ukatu egin ditu bere aurkako salaketa guztiak, eta nabarmendu du «nazioarteko legediak errespetatu» dituela une oro.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.