Osasuna futbol taldeko ikuskatzaile bat atxilotu dute adingabeen aurkako sexu abusu kasu bat egotzita. Osasunak ohar bidez jakinarazi duenez, Errioxako taldeekin duten harremanaz arduratu da gizona, «beraien beharrak talde gorritxoari jakinarazteko», eta ikuskatzaile modura txostenak ere egin ditu gazteen eta kadeteen partidetan. Ordea, inoiz ez da izan entrenatzaile. Taldeak azaldu duenez, gainera, ekainetik ez du lanik egin taldearentzat, eta jakinarazi dute kontratua etetea erabaki dutela. Gizona Errioxako (Espainia) Varea klubeko entrenatzailea izan da larunbatera arte.
Oraingoz ez dute atzeman Osasunan atxilotuaren biktimarik. Osasunaren esanetan, familientzako arreta zerbitzu espezializatu bat daukate, «jokalarien bizitza pertsonalean edo ikasketetan edozein aldaketa atzematea ahalbidetzen duena», eta oraindik behintzat ez dute gizonari lotutako kasurik atzeman.