Peruko armadak jakinarazi duenez, Sendero Luminoso talde armatuko hamar eta hamabost kide inguru hil eta beste hainbat zauritu dituzte operazio militar batean. Baina taldeko buruak, Victor Quispe Palominok, ihes egin du. Militarrek uste dute zaurituta dagoela. Bi militar ere hil dira borroketan. Armadak berak zabaldu duenez, hainbat arma, komunikaziorako tresnak, ordenagailuak eta idatziak ere aurkitu dituzte kanpalekuan.
Joan den ostegunean hasi zuten operazio militarra Vizcatan eskualdean, Peru erdialdean. Inguru horretan ekoizten da herrialdeak esportatzen duen kokainaren ia erdia, eta asko dira bertan dauden droga trafikatzaile taldeak ere. Hori dela eta, eskualde osoa larrialdi egoeran dago duela hamarkada batetik.
Abimael Guzmanek sortu zuen Sendero Luminoso erakundea, 1980an, Peruko Estatuaren aurka egiteko; talde armatuaren eta polizien arteko borrokak bi hamarkada iraun zuen. Egia eta Erreparaziorako Batzordearen arabera, 70.000 hildako eta desagertu eragin zituen gatazkak.
Guzman bera 1992an atxilotu zuten, eta iazko irailean hil zen, segurtasun handiko espetxe batean. Taldeko sortzailea atxilotu ostean, Quispe Palomino anaiek hartu zuten Sendero Luminosoren ardura, baina Guzmanek ez zuen onartu haien buruzagitza, eta anaiek eurek entzungor egiten zioten buru izandakoaren aginduei. Bi anaietako bat, Jorge Quispe Palomino, iazko martxoan hil zen.
