Albistea entzun

Kanpo merkataritza

Esportazioak %24 ugaritu dira aurten, energiaren krisiak bultzatuta

Pandemia aurreko kopuruetan dago Hego Euskal Herriko kanpo merkataritza, baina inportazioak gehiago hazi dira. Hodien salmenta ere asko handitu da, eta autogintzak eutsi egin dio.

Gas likidotua garraiatzen duen ontzi bat, Bilboko portuan
Gas likidotua garraiatzen duen ontzi bat, Bilboko portuan Luis Tejido/ Efe Tamaina handiagoan ikusi

Jokin Sagarzazu -

2022ko abuztuak 18

Kanpo merkataritzak indartsu jarraitzen du Hego Euskal Herrian, eta, urteko lehen erdiko joerari eusten badio, aise gaindituko ditu pandemia aurreko markak. Ukrainako gerraren ondorioek eraginik izan badute, onerako izan dira, emaitzei erreparatuz gero behintzat. Urteko lehen erdian, %23,7 ugaritu dira esportazioak eta %37,3 inportazioak, iazko epe berarekin alderatuta. Bereziki energiaren sektoreak bultzatuta gertatu da hori, %150eko eta %99,8ko igoerekin, hurrenez hurren.

Hego Euskal Herriko ekonomia esportatzailea da, kanpotik erosten duen baino nabarmen gehiago saltzen du, eta aurten ere hala gertatzen ari da: orain arte 4.084 milioi euroko saldo positiboa izan du, Eustaten eta Nastaten datuen arabera.

Hala ere, inportazioak esportazioak baino gehiago hazi izanak eta hori hain modu argian gertatu izanak agerian uzten du behar energetikoak erabat baldintzatzen ari direla kanpo merkataritza. Ukrainako gerraren aurretik hasi zen joera hori, pandemia osteko suspertze ekonomikoarekin batera, eta, denborak aurrera egin ahala, indar handiagoa hartu du.

Hala ere, inportazioak esportazioak baino gehiago hazi izanak eta hori hain modu argian egin izanak agerian uzten du behar energetikoak erabat baldintzatzen ari direla Hego Euskal Herriko kanpo merkataritza. Ukrainako gerraren aurretik hasi zen joera hori, pandemia osteko errekuperazio ekonomikoarekin batera, baina, denborak aurrera egin ahala, indar handiagoa hartu du.

Urteko lehen erdian, produktu energetikoek izan dituzte igoerarik handienak, bai esportazioetan, bai inportazioetan. Beste sektore batzuetan ere, industrian bereziki eta tutugintzan zehatzago, nabarmen handitu dira kanpo erosketak eta salmentak, pandemia osteko geldialdiaren ondoren. Eta autogintzak ere eutsi egin die osagaien faltak eragindako produkzio etenaldiei.

Gehiago ekarri, gehiago saldu

Esportazioetan, petrolio olio finduek %150eko hazkundea izan dute. Bereziki Petronorrek Bizkaian dituen azpiegituretan ekoizten dira produktu horiek, ekarritako petrolioarekin, eta horietako asko kanpoan saltzen dira gero. Ohi baino petrolio eta gas gehiago iritsi da kanpotik, itsasontziz, eta horrek produktu energetikoen inportazioen igoera handia ekarri du: %99,8koa. Gasaren kasuan, Bilboko portuan dagoen Bahia de Bizkaiara ekartzen da, barkuetan; gas likidotua han tratatzen da, eta ondoren gasbideetan sartzen.

Produktu energetikoen inportazio eta esportazioen hazkundea handiagoa izaten ari da Ukrainako gerrak aurrera egin ahala, hornikuntza arazoen beldur. Ekainean, %263 handitu ziren inportazioak eta %264 esportazioak, aurreko urteko urteko hil bereko datuekin alderatuta.

Hego Euskal Herrian ekoitzitako hodien eta autoen salmentak ere handitu dira: sektore energetikoarekin lotura estua duten tutuen kasuan %211,8koa izan da ekainean, eta %133,1ekoa urteko datu metatuetan. Autogintzan, apalagoa izan da igoera; Nafarroan (Volkswagen), %18,9koa, eta Araban (Mercedes), %15,4koa, urteko lehen erdian. Sektore horrek du bolumenik handiena Hego Euskal Herriko inportazioetan.

Lurraldeka, Bizkaiko esportazioek izan dute igoerarik handiena (%36), baina hura da saldo negatiboa duen bakarra —gehiago inportatzen du esportatu baino—, haren produktu izarra hidrokarburoak direlako: 1.586 milioi euroko saldo negatiboa izan du. Araban, berriz, %33,5 hazi dira inportazioak, baina saldoa positiboa da, 1.802 milioikoa; Gipuzkoan %27,4 igo dira kanpo salmentak, 2.020 milioiko alde positiboarekin; eta Nafarroan %13,8 hazi dira inportazioak, eta 1.821 milioiko saldo positiboa izan du.

Esportazioetan Frantziak hartu du Alemaniaren lekua. Hara joan dira salmenten %15,8, eta Alemaniara %15. Historikoki, Erresuma Batua (%6,3) izan da merkatuetan hirugarrena, baina brexit-ak eragina izan du, eta orain AEBek (%6,5) hartu diote aurre. Inportazioetan ere AEBek igoera nabarmena izan dute —ekainean %327,8koa—, bereziki handik ekarritako gasarengatik. Errusiako inportazioek %36 egin dute behera.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Etxe bat eraikitzen, Iruñean, artxiboko irudian. ©Idoia Zabaleta / Foku

Nafarroako ekonomia %4,3 hazi zen 2022. urtean

Iker Aranburu

Kontsumoaren eskutik, urteko azken hiruhilekoan berriro bultzada izan du barne produktu gordinak, %0,8 hazkundearekin.

Zamaketariak eta portuko beste langileak Baionako portua blokeatzen, atzo, Tarnosen. ©PATXI BELTZAIZ

Erretreten erreformaren aurkakoek Baionako portua blokeatu dute

Iker Aranburu

Erretreta gibelatzeko proiektuari buruzko eztabaida astelehenean hasiko da Frantziako Asanblean

LABek  elkarretaratzea egin zuen azaroan, Adegiren egoitzaren atarian. ©Jon Urbe / Foku

Lehen bilera Gipuzkoako metalgintzan

Irune Lasa

Sindikatuek langileen erosahalmena bermatzeko adinako soldata igoerak nahi dituzte.

Urteko azken hiruhilekoan 9.000 lanpostu galdu dira Hego Euskal Herrian

Urteko azken hiruhilekoan 9.000 lanpostu galdu dira Hego Euskal Herrian

Jokin Sagarzazu

Bereziki zerbitzuen sektorean nabaritu da: 22.700 langile gutxiago daude. Industriak eta eraikuntzak eutsi egin diote, eta enplegua sortzen jarraitu dute.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.