Jendetza bildu da Donostiako karriketan euskal presoen aldeko aldarriak ozentzeko. Sare plataformak deiturik, eta piraten, kofradien eta jai batzordearen babesean, ehunka herritar aritu dira protestan, 12:30etik, Etxera bidea gertu lelopean. Bulebarrean ekin diote manifestazioari, eta «euskal presoak etxera» oihu artean egin dute bidea, porturaino. Irmo egin dute salbuespen politiken kontra.
Hasi da Donostiako Manifestazioa. Gogoratu behar dugu oraindik ere 58 Euskal Preso daudela Espainiako eta Frantsesez estatuen espetxetan urrunduak. Mobilizatzea beharrezkoa da oraindik, gaur Donostian eta Abuztuaren 26 Bilbon egingo dugun bezala. #etxerabideagertupic.twitter.com/jKyC2adrck
— Sare #IzanBidea ↗ï¸Â (@sare_herritarra) August 20, 2022
Euskal presoak etxetik urruntzen dituzten espetxe politiketan jarri du arreta Sarek, beste behin. Horri dagokionez, lorpenak ere ekarri dituzte gogora, pozez, manifestazioaren ondotik eginiko analisian. «Irribarre egiten has gaitezke, aurrera egiten ari baikara», esan du Sareko Nahikari Iturbek. Izan ere, azpimarratu dutenez, jadanik urtebete joan da Andaluziako, Murtziako, Levanteko eta Galiziako kartzeletan euskal presorik ez dagoenetik. Halere, ohartarazi dute «bide luzea» dutela egiteko oraindik. «Egin dezagun irribarre, baina lan egiten jarraitzeko, atzerapausorik eman gabe».
Kopuru bat nabarmendu dute: 58 euskal herritar dira Espainiako edo Frantziako kartzeletan preso. Salbuespen politikak dira horren erantzule, batik bat. «Espetxeak bere baitan biltzen duen etxeratze prozesua gauzatzeko ordua da. Eta horretarako salbuespenak araua izateari utzi behar dio; graduen progresioa, irteera baimenak, larriki gaixo diren presoen etxeratzeak, gurasotasun eta familia eskubideak... bide horretan aurrera eginez jarraitu beharra dugu».
