Guardia Zibilak eta Frantziako Poliziak migratzaileak Hego Euskal Herritik Ipar Euskal Herrira eta Frantziara pasatzen zituzten hiru pertsona atxilotu dituzte, Espainiako Gobernuak Euskal Autonomia Erkidegoan daukan ordezkaritzak jakinarazi duenez. Horietako bat Nafarroan atxilotu dute, eta bestea, Gipuzkoan. Haien esanetan, migratzaileei kobratu egiten zieten.
Atxiloketak egiteaz gain, etxe bat miatu dute Beran (Nafarroa). Sakelako bi telefono, bi ordenagailu eramangarri eta GPS bat eraman dituzte bertatik.
Espainiako Gobernuak EAEn duen ordezkaritzaren arabera, honela jarduten zuten: Irun (Gipuzkoa) eta Hendaia (Lapurdi) arteko muga igaro nahi zuten migratzaileak atzematen zituzten, eta, ordaindu beharreko prezioa adostutakoan, autoz muga igarotzen laguntzen zieten. Azaldu dutenez, normalean Baionara, Hendaiara edo Bordelera (Frantzia) eramaten zituzten, autoz. Espainiako Gobernuko Barne Ministerioaren esanetan, azken lau hilabeteetan 40 bidaia egin zituzten, eta horietako bakoitzean hiru edo lau pertsona eraman zituzten. Auzia Iruñeko epaitegiaren esku geratu da.
