Espainiako Vueltan Sam Bennett (Bora) da azkarrena. Bigarren etapako emaitza berbera izan da hirugarrenean, eta hori baieztatu du esprinter irlandarrak: bera izan da indartsuena, berriz ere bigarren egin duen Mads Pedersenen (Trek) aurretik amaituta. Hirugarren izan da Daniel McLay (Arkea).
Liderraren elastiko gorria Edoardo Affinirena (Jumbo) da oraindik ere, taldekako erlojupekoan Jumbok lortu zuen emaitzari esker.
Lehen hiru etapak Herbehereetan jokatu dituzte, baina orain Euskal Herrira iritsiko da lasterketa. Txirrindulariek atseden eguna izango dute bihar, eta asteartean 152 kilometroko etapa jokatuko dute Gasteiz eta Laguardia (Araba) artean. Asteazkenean, berriz, Irunen (Gipuzkoa) hasiko da etapa, eta Bilbon bukatu; 187 km izango ditu etapa horrek. Amaitzeko, Bilbon abiatuko da osteguneko etapa ere.
