Gasteizko Udaltzaingoak 26 urteko gizonezko bat atxilotu zuen atzo, bikotekidea jo izana egotzita. Larunbat gauean gertatu zen. Gasteizko Udalak zabaldutako informazioaren arabera, Poliziak abisu bat jaso zuen 01:00 aldera; lekuko batek eman zuen erasoaren berri. Polizia biktimaren etxebizitzara joan zen, eta bertan aurkitu zuten emakumezkoa, zauri batzuk zituela.
Emakumezkoak poliziei esan zien bikotekideak egin ziola eraso; iraindu izana eta jo izana leporatu zion hari. Horiek adituta, gizonaren bila hasi zen Polizia. Ondoko kale batean atzeman zuten azkenik.
