Diru publikoaren xahutzea, opakutasunez jokatzea eta gainkostuak ezkutatu nahi izatea. Hori egotzi diote Iruñeko alkate Enrique Maiari, udalbatzak gaur onartutako adierazpen instituzionalean. PSNren udal taldeak aurkeztu du adierazpena, eta, Nafarroako ikurrari «errespetu instituzionala» adierazteaz gain, udal gobernu taldeak Foruen plazan jarritako bandera erraldoia «diru publikoen xahutzea dela» salatu dute. Horrez gain, Navarra Sumak «opakutasunez» jokatu duela esan dute, «banderaren gastua 100.000 eurotik 180.000ra garestitu dela isilarazteagatik».
PSNz gain, adierazpenaren aldeko botoa eman dute EH Bilduk eta Geroa Baik. Navarra Sumaren bost ordezkariek kontra bozkatu dute.