Gaur goizean Getxon izan den eraso bat ikertzen ari da Ertzaintza. Goizeko 05:00etan pertsona bat Gurutzetako Ospitalera eraman dute, ustez labana batekin egindako zauriak zituela. Ertzaintzak albiste agentziei baieztatu die hori gertatu dela eta ikerketa bat abiatu duela hori argitzeko, baina ez du baieztatu labankada bat izan denik.
El Correo egunkariak, baina, argitaratu du pertsona horrek labana batekin egindako zauriak zituela aurpegian eta lepoan. Gaineratu duenez, kutxazain batean lo zegoela egin diote eraso, eta odolusten ari zela aurkitu dute, konorterik gabe. Egunkari horren arabera, 25 urte ditu erasotuak, eta Ertzaintza erasotzaileen bila ari da; inguru horretan zegoen pertsona bat identifikatu dute, zer ikusirik ote duen jakiteko.