Albistea entzun

MELILLAKO MIGRAZIO KRISIA

Giza Eskubideen Marokoko Erakundeak 70era igo du Melillako hesian desagertuen zenbatekoa

Desagertuen artean, hamar hildako identifikatu dituzte. Europako Legebiltzarrak Espainiako Barne Ministroari eskatu dio gertatutakoari buruzko azalpenak emateko. 75 migratzaile epaitu edo kondenatu ditu Marokok, Melillako jauziarekin lotuta.

Marokoko Giza Eskubideen Erakundea, duela aste batzuk emandako prentsaurreko batean.
Marokoko Giza Eskubideen Erakundea, duela aste batzuk emandako prentsaurreko batean. EFE Tamaina handiagoan ikusi

Jone Arruabarrena -

2022ko irailak 10

Hirurogeita hamar dira jada ekainaren 24an Melillako hesia igarotzeko ahaleginean desagertutakoak, Giza Eskubideen Marokoko Erakundeak jakinarazi duenez. Horietatik hamar hildako gisa identifikatu dituzte, erakundeak egin duen ikerketa batean.

Ekainaren 24an 1.500 migrante inguru saiatu ziren Melillako muga zeharkatzen; 37 hil ziren, eta 500 inguruk lortu zuten muga pasatzea. Gehienak, ordea, Marokora bueltatu zituen Espainiako Poliziak momentuan bertan, legez kanpo. 133 izan ziren Melillan geratzea lortu zuten migranteak. GKEek salatu dutenez, Espainiako Poliziak bueltatu zituenetako asko Marokok beste herrialde batzuetara edo basamortura kanporatu zituen autobusetan sartuta, asko larri zaurituta zeuden arren.

Melillan lan egiten duten Gobernuz Kanpoko Erakundeek Espainiako eta Marokoko gobernuei gertatutakoaren ingurukoa ez ikertzea leporatu diete askotan, eta Europako Legebiltzarrak ere Espainiako Barne Ministro Grande-Marlaskari «gonbitea» egin dio bertan gertatutakoaren inguruko argipenak emateko. Aste honetan zenbait hedabidek aditzera eman dutenez, Legebiltzarrak lau data proposatu dizkio jada Barne Ministroari, baina hark oraindik «ez du argitu» hitzordura joango den.

75 migrante epaitu dituzte

Bestalde, hesia igarotzea lortu ez zuten migratzaileetatik 75 epaitu ditu Marokoko Gobernuak. Lau tandatan banatu dituzte epaiketarako. Batetik, Nadorreko Lehen Instantziako Auzitegiak 11 urteko kartzela zigorra ezarri zien uztailaren 19an 33 migratzaileri. Marokoko Giza Eskubideen Elkartearen arabera, «pertsonak Marokora legez kanpo atera eta sar daitezen antolatzea eta erraztea», eta Polizia «iraintzea eta desobeditzea» egotzi zieten.

Abuztuaren 4an, epaitegi berak zortzi hilabeteko kartzela zigorra ezarri zien beste 14 migratzaileri, «indarkeria eta agintarien aurkako delituak, desobedientzia edo funtzionario publikoei irainak» egitea egotzita. Hain zuzen, Marokok ekainaren 24ko saiakeraren aurreko egunetan Nador inguruko mendietan egindako sarekadetan atxilotu zituzten 14 etorkin horiek.

Abuztuaren 17an, epaitegiak bi urte eta erdiko kartzela zigorra ezarri zien beste 13 migratzaileri, «migrazio klandestinoa antolatzeko talde kriminala eratzeagatik, indar publikoen aurkako indarkeriagatik, eta desobedientziagatik eta jende pilaketa armatua antolatzearren», besteak beste.

Azken taldea, berriz, epaiketaren zain dago oraindik. Irailaren 21ean izango da, eta gainontzekoei baino kargu larriagoak leporatzen zaizkie 15 etorkini. Hamar delitugatik epaituko dituzte, horien artean hesia igarotzeko saiakeraren aurretik polizia agenteak «beraien borondatearen kontra atxikitzea». Izan ere, Efe albiste agentziaren arabera, migratzaile batzuek Marokoko bost polizia bahitu zituzten hainbat orduz, «agintariak kanpamentuaren setioa altxatzera behartzeko, atxilotu zituzten kide batzuk askatzeko eta elikagaiak eta sendagaiak ematea eskatzeko».

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Irango protestei elkartasuna adierazteko elkarretaratze bat, joanden azaroan, Australiako Parlamentuaren parean, Canberran. ©LUKAS COCH, EFE

Iranek herritar bat exekutatu du, azken hilabeteetako protestekin lotuta

Gorka Berasategi Otamendi

Kondenatuari —23 urte— estatuko indarren agente bat labanaz zauritzea egotzi diote. Agintari judizial gorenaren esanetan, «aurki» gauzatuko dituzte mobilizazioen harira ezarritako beste heriotza zigor batzuk ere.

Benjamin Netanyahu Israelgo lehen ministro ohia, herrialdeko parlamentuan, joan den azaroaren 15ean. ©ABIR SULTAN, EFE

Netanyahuk gobernua eratzeko akordioa itxi du ultrekin eta muturreko ortodoxoekin

Gorka Berasategi Otamendi

Shas eta Sionismo Erlijiosoa alderdien esku geldituko dira, besteak beste, Barne eta Ogasun ministerioak. Smotrich ultranazionalistak Zisjordaniaren gaineko botere handia pilatuko du.

Ecowaseko ordezkariak eta Gineako junta militarrekoak elkarrekin, iazko irailean Konakryn egin zuten bilera batean. ©STR / EFE

Afrika mendebaldeko estatuek indar militar bat eratuko dute

Gorka Berasategi Otamendi

Ecowasen xedea da egonkortasuna bermatzea estatu kolpeek astindutako eskualde horretan. Maliri, Gineari eta Burkina Fasori eskatu die azkartu dezatela boterea zibilei itzultzeko prozesua

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...