Ofiziala da. EH Bilduko zuzendaritzak bere militanteei proposatu die Maddalen Iriarte izatea Gipuzkoako zerrendaburu datozen foru hauteskundeetan. Gaur egungo legebiltzarkidea Gipuzkoako ahaldun nagusi izateko hautagai litzateke, baldin eta oinarriek proposamena babestuz gero.
Twitter bidez baieztatu du Iriartek prest dagoela erronkari aurre egiteko.
Gipuzkoa gobernatzeko @ehbildu-k egindako erronka onartzen dut, politika publikoen bitartez gipuzkoarren eguneroko bizitzan eragin zuzena izateko aukerak ditugula uste baitut.
— Maddalen Iriarte Okiñena (@MaddalenIriarte) September 24, 2022
EH Bilduren barne prozesuari errespetuz, mila esker egunero zuen konfiantza erakusten didazuen guztioi.
Proposamen horrekin, foru eta udal hauteskundeetan lurraldeetako eta hiriburuetako azken hautagai nagusia hautatzeko pausoa eman du EH Bilduk. Izan ere, Gipuzkoako ahaldungai nagusia zein izango zen jakitea falta zen. Arnaldo Otegi koordinatzaile nagusiak aurreratua zuen emakumea izango zela.
Bizkaian, Iker Casanova legebiltzarkidea izango da ahaldun nagusi izateko hautagaia, eta Maria del Rio Alternatibako kidea Bilboko alkategaia. Araban, berriz, azken urteetako lanaren segida izango dira Eva Lopez de Arroiabe batzarkidea eta Rocio Vitero Gasteizko zinegotzia. Donostiako alkatetzarako, Juan Karlos Izagirre alkate ohia proposatu du.
Nafarroan, berriz, Laura Aznal parlamentaria izango da zerrendaburu, eta Joseba Asiron Iruñeko alkategai.